.png)
Kur kanë kaluar më shumë se 10 vjet nga ngjarjet e “21 janarit, janë rihapur hetimet për vrasjen e Aleks Nikës, e mbetur ende pa autor dhe plagosjen e dy protestuesve të tjerë.
Me kërkesë të Policisë së Tiranës, Prokuroria e kryeqytetit po vijon me veprime konkrete prej më shumë se një muaji, ku hetimet kanë filluar nga e para.
LEXO EDHE:
– 21 janari/ 9 vite nga vrasja e 4 protestuesve, familjarët presin drejtësi
– Ç’ndodhi më 21 janar? Saga e një (pa)drejtësie pa fund
Hetimi për vrasjen e Nikës ishte pezulluar, pasi nuk kishte asnjë autor të dyshuar, edhe pse në janar të këtij viti u kërkua një riekspertim për plumbin që e qëlloi.
I riu nga Lezha u plagos rëndë me plumb në kokë para selisë së Kryesisë së Kuvendit dhe gjeti vdekjen dy javë më pas në Turqi në një spital. Po ashtu, Gjykata Evropiane e të Drejtave të Njeriut, ka nisur shqyrtimin e padisë së ngritur nga familjarët e të ndjerit.
Drejt institucioneve të Shqipërisë, është dërguar dhe dosja me kërkesat që ka Strasburgu për procesin e nisur nga prokuroria dhe drejtësia në vendin tonë.
Familjarët akuzojnë Shqipërinë për një mungesë hetimi efektiv për zbardhjen e ngjarjes dhe për mohimin e aksesit të familjarëve në fazën hetimore të procesit.
Ndërkohë institucioni i ‘Avokokaturës së Shtetit’ me anë të një letre zyrtare drejtuar Gjykatës së Tiranës, ka kërkuar informacion për pyetjet që gjykata e Strasburgut ka dërguar në lidhje me hetimin e Aleks Nikës.
Aleks Nika është një nga 4 protestuesit e vrarë në bulevardin ‘Dëshmorët e Kombit’ në vitin 2011 nga Garda e Republikës gjatë protestës së opozitës që drejtohej nga kryeministri aktual Edi Rama.
Për vrasjen e Ziver Veizit, Faik Myrtajt dhe Hekuran Dedës, Gjykata e Apelit të Tiranës dënoi ish-kreun e gardës Ndrea Prendi me 1 vit burg dhe gardistin Agim Llupo me 3 vite e pak muaj.
Partia Socialiste akuzoi ish-kryeministrin Sali Berisha si urdhërues të vrasjeve të protestuesve.
Ndërsa Berisha e cilësoi “21 janarin” si një tentativë për grusht shteti, duke deklaruar se garda ka mbrojtur institucionin shtetëror dhe se ka zbatuar vetëm ligjin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
