Rastësia e dashurisë në ‘Lehtësia e padurueshme e qenies’

Nga Gazeta Si - Romani “Lehtësia e padurueshme e qenies” nga Milan Kundera, shkrimtar çek i lindur më 1 prill 1929 dhe që u nda nga jeta më 12 korrik 2023, tregon historinë e dashurisë mes çiftit Tomas dhe Tereza, me të cilët ndërthuret edhe jeta e dy personazheve të tjerë: Sabine, dashnorja e Tomas dhe Franz, i dashuri tjetër i Sabinës.

Një dashuri e lindur nga rastësia

Dashuria mes Tomas dhe Terezës lindi falë një sërë rastësish. Është një zinxhir ngjarjesh që i bëjnë dy protagonistët të njihen dhe të dashurohen thuajse fshehurazi, pa e kuptuar as ata menjëherë. Një marrëdhënie, ajo e tyre, e përbërë gjithashtu nga zgjedhje të diskutueshme dhe në njëfarë mënyre egoiste të jetës.

Tomas, një mjek me një martesë të mëparshme, është një burrë që i do gratë. Edhe pse Tereza është e vetmja, të cilës i ka hapur shtëpinë e vet, duke krijuar kështu një lloj marrëdhënieje të veçantë dhe specifike, Tomas nuk mund të heqë dorë nga kënaqësia e të shkuarit me gra të ndryshme, duke përjetuar të ashtuquajturat “miqësi erotike”.

Vuajtja e Terezës

Duke e ditur këtë, Tereza vuan. Megjithatë, ajo preferon të heshtë dhe të shijojë atë dashuri shumë të dëshiruar që Tomas gjithsesi i tregon asaj në mënyrën e tij.

Tereza ka etje për dashuri, deri në atë pikë sa krijon një miqësi me një nga dashnoret e burrit të saj, Sabinën. Sabina, e paaftë për të dashur, megjithatë do të donte një stabilitet sentimental që duket se e gjente tek një burrë tjetër i martuar, Franz.

Njerëzit e zakonshëm

E veçanta e “Lehtësia e padurueshme të qenies” është pikërisht zgjedhja e personazheve të zakonshëm, kushdo që e gjallëron këtë roman jeton një jetë normale, të mbushur me ndjesi dhe ndjenja të përziera.

Një jetë ku rastësia hyn dhe sjell dashuri dhe po ashtu, ajo dashuri nuk është në gjendje ta bëjë atë të shkëlqejë. Ekziston një lëkundje e vazhdueshme midis rëndesës dhe lehtësisë së jetës dhe ngjarjeve të saj, gjë që i bën personazhet të vuajnë dhe të gëzohen në një ekuilibër delikat.

“Lehtësia e padurueshme e qenies”

I frymëzuar nga filozofia niçeane e kthimit të përjetshëm, Milan Kundera i jep jetë një prej kryeveprave të tij më të mëdha letrare, “Lehtësia e padurueshme e qenies”.

I shkruar në vitin 1982, ky libër prezantohet menjëherë në formën e një romani-eseje, duke i dhënë autorit një alternativë të vlefshme ndaj modeleve tradicionale narrative të së shkuarës.

Për Milan Kunderën romani nuk heton realitetin, por qenien. “Lehtësia e padurueshme e qenies” është një hulumtim me stil, i cili na çon drejt e te vetja, tek të tjerët, te jeta e dhunshme, te drama e shpresave delikate. /Libreriamo/

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.