.png)
Gazeta Si – Gjykata e Posaçme e ka quajtur të paprecedentë sjelljen e Policisë së Shtetit, në rastin e protestës së organizuar nga mbështetësit e Kryetarit të Bashkisë, Erion Veliaj, para godinës së saj, teksa brenda zhvillohej seanca për vlerësimin e masave të sigurisë.
Në një letër të dërguar nga GJKKO në drejtim të Policisë së Shtetit, AMP dhe Ministrisë së Brendshme, thuhet se nga protesta u cenua jeta e gjyqtarëve dhe punonjësve.
“Nuk ka pasur asnjë reagim nga ana e saj për të bashkëpunuar me Gardën e Republikës së Shqipërisë, duke treguar një indiferentizëm të pashpjegueshëm në ndjekjen dhe parandalimin e kësaj situate, e cila mund të rrezikonte seriozisht jetën dhe shëndetin e gjyqtarëve dhe personelit administrativ. Kjo apati institucionale, përbën padyshim një cenim të rëndë të pavarësisë së gjyqësorit. Gjykata e Posaçme e Shkallës së Parë për Korrupsionin dhe Krimin e Organizuar e ka konsideruar këtë sjellje të paprecedent të Policisë së Shtetit, të papranueshme dhe në kundërshtim me ligjin”, thuhet në një reagim të Gjykatës së Posaçme.
GJKKO kërkon nga Ministria e Brendshme që të marrin masat e duhura për vënien përpara përgjegjësisë administrative apo ligjore, të gjithë personat përgjegjës të Policisë së Shtetit, të cilët nuk kanë marrë masat e duhura, për të shmangur apo monitoruar këtë situatë të paprecedentë.
“Nëpërmjet shkresës më sipër, Gjykata e Posaçme e Shkallës së Parë për Korrupsionin dhe Krimin e Organizuar, i është drejtuar Ministrisë së Brendshme dhe Drejtorisë së Përgjithshme të Policisë së Shtetit, që të marrin masat e duhura për vënien përpara përgjegjësisë administrative apo ligjore, të gjithë personat përgjegjës të Policisë së Shtetit, të cilët nuk kanë marrë masat e duhura, në zbatim të ligjit, për të shmangur apo monitoruar këtë situatë të paprecedentë”, thuhet në reagim.
GJKKO sjell edhe shembujt e dy protestave që janë mbajtur nga Partia e Lirisë më 6 dhjetor 2024 dhe protestës së Sali Berishës më 6 janar 2025, duke kërkuar që të informohen mbi masat që janë marrë në këto dy raste dhe pse nuk veprua në mënyrë të njëjtë edhe në rastin kur para GJKKO u mblodhën mbështetësit e Veliajt.
Reagon edhe SPAK, i kërkon përgjegjësit Ministrisë së Brendshme
Përveç GJKKO-së, edhe SPAK i është drejtuar Ministrisë së Brendshme dhe Drejtorisë së Përgjithshme të Policisë së Shtetit.
Prokuroria e Posaçme shpreh shqetësimin mbi mungesën e reagimit në garantimin e sigurisë dhe rendit publik, përpara dhe gjatë seancës gjyqësore që u zhvillua të mërkurën.
SPAK thekson se prokurorët, gjyqtarët dhe personeli janë penguar nga protestuesit duke sulmuar automjetet dhe kanë përdorur fyerje e kërcënime ndaj tyre.
“Gjatë protestës së zhvilluar më 12.02.2025, protestuesit kanë penguar lëvizjen e prokurorëve, gjyqtarëve dhe personelit duke sulmuar automjetet dhe kanë përdorur fyerje dhe kërcënime ndaj tyre”, njofton SPAK.
Prokuroria e Posaçme e konsideron qëndrimin e policisë në shkelje flagrante të detyrimeve ligjore dhe një cenim serioz të pavarësisë së institucioneve të drejtësisë.
“Gjithashtu e konsideron qëndrimin e Policisë së Shtetit një shkelje flagrante të detyrimeve ligjore dhe një cënim serioz të pavarësisë së institucioneve të drejtësisë. Mosveprimi për të garantuar sigurinë e prokurorëve dhe gjyqtarëve si dhe institucioneve të drejtësisë bie ndesh edhe me standardet ndërkombëtare si dhe ato që lidhen me kushtet e Marrëveshjes së Stabilizim-Asociimit me Bashkimin Evropian për mbrojtjen e sundimit të ligjit”, njoftoi SPAK.
Prokuroria e Posaçme thotë se sipas ligjit, Gjykata e Posaçme dhe SPAK, mbrohen nga Garda e Republikës pasi ndodhen në të njëjtin objekt. Mirëpo në nenin 7, pika, 1 germa “I”, parashikohet bashkëpunim edhe me policinë e shtetit për garantimin e sigurisë, veçanërisht në raste të situatave të jashtëzakonshme.
“Duke u mbështetur tek raportimet e punonjësve të Gardës së Republikës janë kryer kërkesa të përsëritura për ndihmë drejtuar Policia e Shtetit për të garantuar perimetrin e jashtëm të SPAK dhe Gjykatave të Posaçme, duke vendosur një kordon sigurie të forcave policore. Kjo praktikë është ndjekur edhe më parë në protestat e zhvilluara, pranë ambienteve të SPAK dhe Gjykatave të Posaçme”, njoftoi SPAK.
Për këtë arsye, Prokuroria e Posaçme ka kërkuar përmes një shkrese zyrtare marrjen e masave nga Ministria e Brendshme dhe Drejtoria e Përgjithshme e Policisë së Shtetit për të vënë përpara përgjegjësisë personat e duhur për mungesën e reagimit si dhe një shpjegim të argumentuar për mungesën e masave si në rastet e tjera të ngjashme.
Shkresa e SPAK i është drejtuar veç Ministrisë së Brendshme, Drejtorisë së Përgjithshme të Policisë së Shtetit, edhe Agjencisë së Mbikëqyrjes Policore si edhe për dijeni Këshillit të Lartë të Prokurorisë dhe Delegacionit të Bashkimit Europian në Shqipëri.
Një ditë më parë, ministri i Brendshëm Ervin Hoxha u përpoq të zbutë situatën, teksa u pyet për këtë çështje.
Hoxha i doli në mbrojtje policisë, e cila nuk ndërhyri për të shpërndarë mbështetësit e Kryetarit të Bashkisë së Tiranës, me pretendimin se ata ishin simpatizantë dhe jo protestues.
Pikërisht për këtë, policia nuk referoi asnjë material në prokurori dhe nuk procedoi asnjë person penalisht në gjendje të lirë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
