.png)
Nga Gazeta Si - Një re tymi u ngrit nga galeria e artistit Damien Hirst në Londër, pasi 1000 piktura të tij u ndezën në flakë. Mijëra të tjera do të bëhen hi përpara se të mbarojë muaji.
Megjithatë, kjo nuk ishte rastësi. I gjithë kati i dytë i Galerisë dykatëshe të Neëport Street Gallery ishte i mbushur me një erë si zjarri, ndërsa gazetarët dhe kameramanët u mblodhën për të parë 57-vjeçarin të ushqente me piktura flakët e një djegësi të veshur me xham, pas komentit të tij të fundit mbi artin dhe forcave që e diktojnë.
Ngjarja e transmetuar drejtpërdrejt në Instagram është pjesë e projektit të Hirst, “Monedha”, që filloi 6 vite më parë me krijimin e 10.000 pikturave unike të pikëzuara. Asnjë punë nuk është identike me tjetrën dhe as dy pika në të njëjtën pikturë nuk janë në të njëjtën ngjyrë.
Hirst nuk i shiti veprat e tij, por i mbylli në një kasafortë dhe iu ofroi koleksionistëve një mundësi për të blerë një nga 10.000 NFT korresponduese. Më pas ai u dha blerësve një zgjedhje: këmbimin në veprën dixhitale për atë fizike që përfaqëson ose djegien. Pronarët e 4851 prej tyre zgjodhën mundësinë e dytë.
Pavarësisht ngjyrimeve të trishta të djegies së veprave, Hirst ishte i lumtur teksa shkatërronte punën e tij, buzëqeshte, bënte mimika dhe bisedonte me gazetarët. Ndonëse i refuzoi fillimisht intervistat, artisti iu përgjigj disa pyetjeve më vonë.
“Për mua nuk është kumar”, tha ai për pyetjen që iu drejtua nëse NFT-të vlejnë më shumë se veprat fizike, “ka vetëm art”.
Një ditë më parë, Hirst shkroi në Instagram: “Shumë njerëz mendojnë që unë po djeg art miliona dollarësh, por jo. Vlera e artit dixhital ose fizik, e cila është shumë e vështirë për t’u përcaktuar në kohërat më të mira, nuk do të humbasë, do të transferohet në NFT sapo ato të digjen”.
Të prodhuara në vitin 2016, pikturat origjinale u nënshkruan të gjitha, u numëruan dhe u dhanë tituj unikë. Nuk ka dy vepra identike dhe nuk ka dy pika në një pikturë të vetme në të njëjtën ngjyrë.
Çdo vepër arti u lidh më pas me një NFT, një shenjë dixhitale e mbështetur nga blockchain që mund të blihet dhe shitet. Verën e kaluar, aplikantëve të suksesshëm iu nda një shenjë e rastësishme për 2,000 dollarë secili.
Hirst, së bashku me Tracey Emin, konsiderohet një anëtar kyç i lëvizjes ‘Artistët e Rinj Britanikë’ që u shfaq në Londër në vitet 1980. Ai i ka bërë pikturat e tij karakteristike me pika për më shumë se tri dekada. Pikat me ngjyra të pikturave ndryshojnë në densitet, hije dhe rregullsi, duke i bërë ato njëherësh unike dhe pothuajse të padallueshme nga njëra-tjetra.
Puna e artistit shpesh - dhe, për shkak të shumës që mund të shitet, ngre pyetje rreth parave në botën e artit. Një nga veprat e tij më të njohura është një derdhje platini e një kafke njeriu, e mbuluar me më shumë se 8600 diamante, e cila u shit për 50 milionë £ (atëherë rreth 100 milionë dollarë) në 2007.
Megjithatë, ai nuk është i vetmi person në hapësirën NFT që ka luajtur me zjarrin. Në mars 2021, një firmë blockchain e quajtur Injective Protocol bleu një vepër nga artisti anonim i rrugës Banksy për 95,000 dollarë përpara se ta digjte në kamera dhe të shiste një NFT të videos për katër herë më shumë. Ndërkohë, muajin e kaluar, koleksionisti i artit në Miami dhe biznesmeni i kriptove, Martin Mobarak, publikoi një video në të cilën ai pretendonte se dogji një vepër të Frida Kahlo-s të vitit 1944 për të nisur NFT-të e tij përkatëse me temë Kahlo.
Hirst ka thënë se djegia e artit të tij kishte për qëllim jo vetëm të nxirrte në pah vlerën e NFT-ve, por të eksploronte idenë se vlera e tregut, si vetë paraja, mbështetet nga besimi. Në një video që prezanton projektin vitin e kaluar, ai e përshkroi atë si një “eksperiment besimi”.
“E gjithë puna është vepër arti”, shpjegoi ai në atë kohë. “Është pothuajse si sjellja e qenieve njerëzore që janë të gjithë të përfshirë në të... thjesht do të ketë një jetë të vetën”. /CNN/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
