Analize

Prag “lufte” me Turqinë, Greqia kërkon me urgjencë mbledhjen e BE

Ndërkohë që luftëanijet greke dhe turke janë rreshtuar përballë njëra-tjetrës në Mesdhe, në pritje të një përballjeje ushtarake nëse njëra palë nuk tërhiqet, Athina zyrtare ka vendosur të kërkojë edhe njëherë ndihmën e Brukselit.

Greqia i ka kërkuar zyrtarisht Bashkimit Europian që të mbajë urgjent një takim të ministrave të jashtëm, për shkak të përplasjeve me Turqinë në Mesdheun lindor.

Tensionet rinisën sërish të hënën kur Ankaraja dërgoi anijen kërkimore Oruç Reis jashtë ishullit grek Kastellorizo, për të zhvilluar shpime për naftë.

“Ministri i jashtëm (do të) kërkojë një takim urgjent të këshillit të punëve të jashtme të Bashkimit Europian,” tha kryeministri grek Kyriakos Mitsotakis. Një zëdhënës i shefit të politikës së jashtme të BE Josep Borrell tha se situata ishte “jashtëzakonisht shqetësuese dhe duhet të zgjidhet me dialog”.

“Nuk mund t’ju them nëse do të marrim vendime sot. Por, sigurisht, ne jemi dakord që situata në Mesdheun lindor është jashtëzakonisht shqetësuese dhe duhet të zgjidhet në një dialog, jo me anë të një seri hapash që po rritin përshkallëzimin dhe tensionet, ” tha zëdhënësi Peter Stano para gazetarëve.

“Me sa duket zhvillimet në terren tregojnë fatkeqësisht se … duhet të bëhet më shumë për të ulur tensionet dhe për të zmbrapsur tendencën shumë negative dhe fatkeqe të përshkallëzimit”, shtoi ai.

“Kjo është arsyeja pse (Borrell) deklaroi se ai po përdor të gjitha përpjekjet e nevojshme për të rivendosur dialogun konstruktiv,” tha zëdhënësi.

Të martën anija kërkimore turke u ndal në juglindje të ishullit të Kretës. Ajo shoqërohej nga një disa anije të marinës turke dhe ndiqej në hije nga anijet luftarake greke.

Një fotografi zyrtare turke tregon Oruc Reis të shoqëruar nga nëntë anije luftarake. Turqia ka njoftuar se anija do të zhvillonte aktivitete midis 10 dhe 23 gushtit.

Nga ana e saj, pala turke të martën insistoi që Oruc Reis dhe anijet shoqëruese po lëvizin brenda raftit kontinental turk dhe u bëri thirrje forcave greke të largoheshin.

Për më tepër, sipas raportimeve, pati 45 shkelje të hapësirës ajrore kombëtare greke mbi Egje nga Forcat Ajrore Turke të martën dhe tre angazhime shkelje nga avionët grekë. Për më tepër, gjatë ditës kishte një informacion të pakonfirmuar në lidhje me lëvizjen e anijeve të flotës turke në zona të ndryshme të Egjeut.

Në të njëjtën kohë, zyrtarët turq insistuan të martën se aktivitetet eksploruese pranë ishullit të Kastellorizo ​​do të vazhdojnë dhe se operacione të tjera do të pasojnë në zonat e përfshira në marrëveshjen e kufirit detar Turqi-Libi, për të cilën Athina thotë se është e pavlefshme. Ministri i Jashtëm Mevlut Cavusoglu vuri në dukje se Turqia do të vazhdojë me aktivitete të reja eksploruese në Mesdhe

Më 13 korrik, ministrat e jashtëm të BE ranë dakord të shtonin masa  shtesë në sanksionet ekzistuese ndaj Turqisë për shkak të kërkimeve për naftë në Mesdheun Lindor. Berlini mësohet se merr përsipër një rol aktiv për të qetësuar situatën, me Ministrin e Mbrojtjes Annegret Kramp-Karrenbauer që deklaroi të enjten se Gjermania po punon për të ulur tesnionet.


Copyright © Gazeta “Si”



Më Shumë