.png)
Gazeta "Si" - Një 60-vjeçare që jeton e vetme mbasi fëmijët i ka jashtë vendit, e ka vënë në pozitë të vështirë policinë e Tiranës. Ajo kërkon identifikimin e dy djemve të rinj e më pas arrestimin e tyre, mbasi ata i rrezikuan qenin e shtëpisë, duke e futur në përleshje me qentë e tyre.
Mbasi ka përshkruar me detaje secilin nga dy djemtë që i ishin afruar shtëpisë së saj private dhe, duke provokuar qenin e saj i kishin turrur dy qen të racës “pitbull”, ajo i ka akuzuar oficerët se përse nuk vepronin, e përse nuk nxirrnin shërbimet që t’i gjenin të rinjtë provokatorë.
Por siç bën me dije policia nga komisariati numër 5 për Gazetasi.al, oficerët e krimeve e kanë marrë shtruar, duke i komunikuar të moshuarës se si nisje të hetimeve, duhet të përfundojnë me marrjen e deklaratës së saj.
“A e keni qenin të vaksinuar dhe a mund të na i vendosni këtë dokument në dispozicion”, – e ka pyetur oficeri i policisë kallëzuesen, duke shtuar më tej pyetjen nëse qeni i saj gjendej jashtë shtëpisë, apo në rrugën e lagjes. Gruaja insiston se qeni i saj, i moshës tetë vjeç është racë shtëpiake dhe se ajo jeton vetëm mbasi fëmijët i ka emigrant . Dhe qeni është më i rëndësishëm se gjithçka ajo ka, pasi vetëm atë ka.
“Dëgjova këta persona, që nuk i njoh, të cilët kishin qen pitbull dhe ja turrën qenit tim. Ju thashë nga ballkoni i vilës mos na i ngatërroni qentë. Por ata qeshën dhe i lëshuan qentë e tyre tek qeni im. Duke u zënë qentë me njëri-tjetrin, ata nuk po ndaheshin më dhe njëri nga djemtë e qëlloi qenin tim në kokë. Qeni u gjakos në kokë dhe më pas këta persona u larguan me qentë e tyre. Kërkoj që kjo çështje të ndiqet penalisht nga ana juaj”- deklaron shtetasja L.D pranë policisë në Kamzë.
Kur oficeri e pyet të moshuarën për pasaportën e vaksinimit ajo përgjigjet që nuk ka asnjë dokument të tillë, kurse pyetjes tjetër se çfarë dëmtimesh kishte pësuar qeni ajo i detajon: “U gjakos në kokë dhe kjo është e padrejtë. E kam qen shtëpie, në fakt kam dy, një me lara. Ky më i madhi mu rrezikua”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
