Pas reshjeve të shiut dhe dëborës me një intensitet të lartë, orët e fundit kanë sjellë një përmirësim të motit një pjesë të mirë të vendit.
Situata e shkaktuar prej reshjeve është përmirësuar, me përjashtim të zonave malore, ku bora dëbora ka shkaktuar probleme me qarkullimin e mjeteve dhe furnizimin me energji elektrike.
Në qarkun e Shkodrës janë ndërprerë reshjet, por disa hektarë tokë bujqësore në zonën e Bushatit mbeten ende nën ujë.
Problem mbetet në këtë qark zonat malore dhe në veçanti segmenti Qafë Thore-Bogë-Theth kalohet vetëm me zinxhirë.
Situata është përmirësuar edhe në qarkun e Lezhës, ndërsa gjatë natës është bërë edhe pastrimi i aksit Lezhë-Ungrej, i cili një ditë më parë për shkak të rrëshqitjes së gurëve dhe dherave mbeti i bllokuar duke izoluar totalisht banorët e 9 fshatrave.
Në qarkun e Korçës vijojnë ende reshjet e dëborës. Shtabi i emergjencave raporton se në rrugën e Dardhës ka 10 deri në 12 centimetra dëborë, çka e bën lëvizjen e automjeteve të vështirë.
Rruga Boboshticë-Dardhë është e kalueshme me zinxhirë nga kilometri i 8 deri në hyrje të fshatit, ku trashësia e borës ka arritur në 10 centimetra. Akset e tjera nacionale që lidhin Korçën me qytetet e tjera janë të qarkullueshëm normalisht.
Po ashtu normalisht qarkullohet edhe në aksin Korçë-Voskopojë, ku ka reshje të lehta bore. Si pasojë e motit të keq kanë mbetur pa energji disa fshatra në njësitë administrative Vithkuq dhe Lekas të Bashkisë Korçë.
Përveç Dardhës, edhe në Valbonë, Qafën e Qarrit, dhe në Voskopojë ka pasur reshje bore, ku sipas ARRSH-ë, rrugët janë të hapura dhe qarkullimi vazhdon pa probleme. Por drejtuesit e mjeteve duhet të jenë të pajisur me goma dimërore dhe zinxhirë paralajmëron ARRSH.
Bashkia e Lezhës ka bërë të mundur pastrimin e gurëve dhe dherave në rrugën që mbrëmjen e së hënës bllokuan dhjetëra familje në Ungrej.
Raportohet se në orët e para të mëngjesit është bërë i mundur pastrimi i rrugës. Tashmë qarkullimi i mjeteve në atë aks vijon pa probleme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.