.png)
Gazeta Si – Dyshimet se mjeku Fitim Marku u kërkonte para pacientëve që kryenin skanerin pranë Spitalit të Traumës ishin shtuar kohët e fundit.
Sinjalizimet nga ana e qytetarëve të ndryshëm, u verifikuan javën e shkuar nga një agjent i infiltruar i policisë, i cili regjistroi bisedën mes tij dhe reumatologut.
Sipas pjesës së parë të dosjes së Prokurorisë që ka mundur të sigurojë Gazetasi.al, mësohet se Marku i arrestuar për korrupsion, vendoste çmim për shërbimin që i ofronte pacientëve, që në fakt duhet të jetë falas.
Në bisedën e përgjuar më 23 shtator në orën 14:20, del se Marku i kërkon 10 mijë lekë një pacienti.
“Kur të mbarosh skanerin, më merr në telefon, më prit aty”. Gjithashtu, biseda zbulon se në skemën e korrupsionit janë edhe të tjerë, pasi ai thotë se paratë i ndan me kolegët.
Pasi i jep paratë, mjeku e udhëzon që të presë jashtë, sepse do bëjë gati diskun me rezultatet e skanerit.
Në dosje, sipas transkriptimit të bisedave të zbardhura, agjenti i policisë, identifikohet me emrin Ardian (emri jo i vërtetë i përdorur gjatë infiltrimit).
Fillimisht, “Ardiani”, bisedon me infermieren, që në dosjen e prokurorisë identifikohet me inicialin “I”.
Pasi e pyet për informacione të përgjithshme, “I” e udhëzon që “pacienti” të bëjë skanerin, pasi ai kishte pasur probleme pas një operacioni.
Në dosjen e zbardhur të prokurorisë, mjeku Fitim Marku, identifikohet me “B”.
Ai e paralajmëron “pacientin” pas kryerjes së skanerit: “Kur të mbarosh, do të flasim bashkë, mirë”. Ndërsa agjenti e pyet: “Vetëm me ty?”.
“Po, do flasim pastaj, më merr në telefon kur të mbarosh dhe më prit aty”, – është përgjigja e Markut.
Më pas vjen infermierja dhe e çon “pacientin” në dhomën e skanerit, ku i jep udhëzime si duhet të pozicionohet.
Pas skanerit, infermierja i thotë që ta presë doktorin jashtë në korridor. Pas takimit, të dy flasin për shumën që duhet të paguajë dhe kërkesën e doktorit.
Pjesë nga përgjimet
Agjenti – Më tha ajo që të prisja këtu në korridor .
Mjeku – Ok më thuaj, si e ke mundësinë tani?
Agjenti – Më thuaj or burrë, më thuaj.
Mjeku – Po ja se këtu është plot me njerëz.
Agjenti – Po sa?
Mjeku – Po ja, njëqindëshe.
Agjenti – 100 mijë lekë?
Mjeku – Po.
Agjenti – Ok.
Mjeku – Se këto i ndajmë me të tjerat.
Agjenti – Ato janë punën tuaja. Për sa e marr diskun? Sa vonon?
Mjeku – Ja sa ta bëj gati, ta sjell unë jashtë.
Agjenti – Ok.
Një skemë që u zbulua nga policia, e cila e arrestoi në ambientet e punës mjekun reumatolog, i cili është shtruar në spital pasi pësoi një ishemi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
