PE miraton Komisionin e ri Europian, mandati 5-vjeçar me në krye Von der Leyen nis më 1 dhjetor (premtimet)

Nga Gazeta 'Si' - Shumica e deputetëve të Parlamentit Evropian i dhanë sot miratimin përfundimtar Komisionit të ri Evropian, me Presidente Ursula von der Leyen.

Miratimi i sotëm lejon ekzekutivin të marrë detyrën më 1 dhjetor dhe të nisë ciklin legjislativ pesëvjeçar.

Komisioni i propozuar mori 370 vota pro, 282 kundër dhe 36 abstenime nga ligjvënësit e Parlamentit Europian në Strasburg, mjaftueshëm për të kaluar.

Në fjalimin e saj hyrës, von der Leyen premtoi një komision të fokusuar drejtpërsëdrejti në ringjalljen e ekonomisë në stanjacion të BE-së, rritjen e konkurrencës, shkurtimin e burokracisë, zhbllokimin e investimeve dhe mbylljen e hendekut të inovacionit me Shtetet e Bashkuara dhe Kinën.

Mbështetja për Ukrainën, mbrojtja, menaxhimi i migracionit, zgjerimi, veprimi i klimës, reforma buxhetore dhe sundimi i ligjit do të jenë gjithashtu ndër prioritetet kryesore të ekipit të saj, që do të formësohen nga një zhvendosje e krahut të djathtë në të gjithë bllokun.

"Lufta jonë për liri mund të duket ndryshe nga brezat e kaluar. Por aksionet janë po aq të larta," u tha von der Leyen ligjvënësve.

"Këto liri nuk do të vijnë pa pagesë. Do të thotë të bëjmë zgjedhje të vështira. Do të thotë investim masiv në sigurinë dhe prosperitetin tonë. Dhe mbi të gjitha, do të thotë të qëndrojmë të bashkuar dhe besnikë ndaj vlerave tona."

Numri i të mërkurës është dukshëm më i vogël se 401 votat që von der Leyen siguroi nga Parlamenti kur u rizgjodh në korrik, duke reflektuar një shumicë në tkurrje të mbështetur nga më pak progresistë dhe më shumë forca të krahut të djathtë.

Përbërja e re e Komisionit Evropian ka 14 anëtarë nga Partia Popullore Evropiane (EPP) që është edhe grupi më i madh politikë në Parlamentin Evropian. Ndërsa liberalët do të kenë 5 anëtarë në Komisionin Evropian, edhe pse kanë shënuar rënie të madhe në zgjedhjet e fundit evropiane duke dalë në pozitën e pestë për nga numri i deputetëve në PE.

Socialistët dhe Demokratët, që mbeten grupi i dytë për nga madhësia në Parlamentin Evropian, kësaj radhe do të kenë vetëm 4 anëtarë në Komisionin Evropian.

Dy komisionarë vijnë nga radhët e partive të ekstremit të djathtë ndërsa një, Marosh Shefçoviq nga Sllovakia, nuk i takon asnjë grupimi pasi partia e kryeministrit sllovak është përjashtuar nga grupimi i Socialistëve dhe Demokratëve për shkak të mospajtimeve në qëndrimet ndaj Rusisë dhe bashkëpunimit me të djathtën ekstreme.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.