.png)
Partia Demokratike akuzon se qeveria po mban të fshehtë marrëveshjen e nënshkruar me fondacionin që do të menaxhojë Parkun Kombëtar të Butrintit me skemën e PPP-së për të fshehur pronarët e vërtetë të këtij fondacioni.
Deputetja e opozitës dhe anëtarja e Komisionit të Edukimit dhe Medias, Ina Zhupa doli në një konferencë për shtyp për të denoncuar, sipas saj, shkeljen e rregullores së Kuvendit dhe të procedurave parlamentare të funksionimit të komisioneve me qëllim mbajtjen sekret të marrëveshjes.
“Deputetët do të votojnë si vegla qorrazi një marrëveshje sekrete për trashëgimninë kulturore. E kanë klasifikuar marrëveshje sekrete dhe e kanë çuar te ekonomia, sepse marrëveshjet sekrete mund t’i ketë vetëm kryetari i komisionit përgjegjës. Duke qenë se te kultura është zonja Açka kryetare e opozitës mund t’u dilte sekreti në shesh. Nisur nga kjo, e kanë çuar te ekonomia, duke qenë se ai komision drejtohet nga zoti Shalsi, i njohur se do të vjedhë më bukur se ish-qeverisja e PD”, tha Zhupa.
Deputetja akuzoi se marrëveshja bie ndesh me Konventën e Parisit për mbrojtjen e trashëgimisë kulturore dhe kërkoi që deputetëve t’u vihet në dispozicion i gjithë dokumentacioni, përfshirë këtu marrëveshjen dhe bashkë me të edhe aktet e themelimit të fondacionit.
“Kërkojmë marrëveshjen e plotë bashkë me aktet e fondacionit, aktet e themelimit, si është përzgjedhur fondacioni privat si menaxhues i trashëgimisë tonë kulturore”, vijoi Zhupa.
Marrëveshja parashikon menaxhimin e Butrintit nga një bord me pesë persona. Edhe emrat e anëtarëve të këtij bordi për momentin janë të panjohur, ndërsa Zhupa hodhi dyshime se pas kësaj marrëveshje nuk është Fondacioni Amerikan-Shqiptar i Zhvillimit.
“Është një fondacion i krijuar për menaxhimin e Butrintit. Nuk është AADF vetë, që në të shkuarën vetëm ka financuar mbrojtjen e trashëgimisë kulturore, pra nuk ka menaxhuar asnjëherë trashëgiminë kulturore”, deklaroi deputetja e PD.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
