.png)
Gazeta Si – Pas 3 muajsh hetime me metoda speciale, një grup kriminal që merrej me shpërndarjen dhe shitjen e lëndëve të forta narkotike është goditur në Tiranë.
Policia thotë se ata shpërndanin drogë në zona të ndryshme të kryeqytetit, afër shkollave dhe lokaleve të natës.
Në një deklaratë për mediat, kreu i policisë së Tiranës, Tonin Vocaj, tha se në total janë lëshuar 24 urdhërarreste, ku 19 prej tyre janë ekzekutuar.
Midis personave për të cilët Gjykata e Shkallës së Parë e Juridiksionit të Përgjithshëm Tiranë ka vendosur masë sigurie, është dhe shtetasi A. Xh., alias A. T., alias J. C., 52 vjeç, banues në Tiranë, i cili është arrestuar në muajin maj të këtij viti, për veprën penale “Vrasja me dashje”, kryer në bashkëpunim, për një ngjarje të ndodhur në shtetin grek.
“Në fazën e dytë të operacionit Tempulli 3, u ekzekutuan masa sigurie arrest me burg për 19 persona dhe vazhdon puna për kapjen e 5 personave të tjerë. Mes personave që gjykata vendosi arrest me burg është edhe Armando Xheladini alias Jetnor Cinellari alias Jetnor Tarushllari, i arrestuar në Maj të këtij viti për vrasje me dashje e kryer në bashkëpunim për një ngjarje vrasje të ndodhur në shtetin në shtetin grek”, tha mes të tjerash Vocaj.
Gjatë operacionit në fjalë u sekuestruan 1.2 kg kokainë, qindra doza heroinë e kanabis, celularë, automjete, si dhe shuma të konsiderueshme parash që dyshohet të jenë përfituar nga shija e lëndëve narkotike.
“Ka dyshime që këta persona bashkëpunonin me njëri-tjetrin, jo të 24-ërt, por në fragmente të caktuara disa prej këtyre individvë. Janë vlerësuar masat e sigurisë nga Gjykata, por do vlerësohen edhe gjatë hetimeve, do jetë masë rënduese për ta nëse rezulton e vërtetë”, shtoi më tej Vocaj.
Faza e dytë e këtij operacioni ka nisur 3 muaj më parë, ndërkohë që policia sekuestroi dhe sasi të konsiderueshme parash të përfituara nga aktiviteti kriminal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
