Shendet

OBSH ka ngritur një grup pune për të studiuar prejardhjen e Covid-19

Një epidemiolog që ndihmoi në lidhjen e shpërthimit të sindromës së frymëmarrjes në Lindjen e Mesme (MERS) në vitin 2012, një oficer i sigurisë ushqimore që studion se si përhapen patogjenët në tregje dhe një veteriner që gjeti prova që lidhnin shpërthimin e Ebolas në Afrikën Perëndimore  në 2014 me lakuriqët e natës që fluturojnë në një pemë. Ata janë pjesë e ekipit që Organizata Botërore e Shëndetësisë (OBSH) ka mbledhur për të hetuar origjinën e pandemisë së koronavirusit.
Studimi synon të zbulojë se si dhe kur SARS-CoV-2 infektoi njerëzit për herë të parë. Dëshmi të forta tregojnë se koronavirusi ka origjinën te lakuriqët e natës, por udhëtimi i tij te njerëzit mbetet një mister. Shkencëtarët thonë se ekipi është shumë i kualifikuar, por detyra e tyre do të jetë sfiduese.
"Ky është një ekip i shkëlqyeshëm me shumë përvojë", thotë Martin Beer, një virolog në Institutin Federal të Kërkimit për Shëndetin e Kafshëve në Greifswald, Gjermani.
Grupi do të punojë me studiues në Kinë dhe profesionistë nga disa agjenci të tjera ndërkombëtare dhe do të fillojë kërkimin në Wuhan, qyteti kinez ku u identifikua për herë të parë koronavirusi i ri SARS-CoV-2  dhe do të zgjerohet në të gjithë Kinën dhe më gjerë.


Grupi ndërkombëtar vjen me një sërë njohurish. Marion Koopmans është një virologe e specializuar në epidemiologjinë molekulare në Qendrën Mjekësore të Universitetit Erasmus në Roterdam, Hollandë. Ajo ishte në ekipin që zbuloi, në 2013, se devetë dromedare ishin një ndër shpëtuesit nga MERS, i cili ka vrarë më shumë se 850 njerëz. Ajo që atëherë ka punuar me një anëtar tjetër të ekipit, Elmoubasher Farag, një epidemiolog në Ministrinë e Shëndetit Publik në Doha, për të provuar nëse deveja ka antitrupa kundër MERS.
Gjatë pandemisë COVID-19, Koopmans ka gjurmuar përhapjen e shpejtë të SARS-CoV-2 në fermat e ndryshme në Evropë. Koopmans thotë se grupi nuk përjashton asnjë skenar për mënyrën se si ka filluar pandemia, përfshirë skenarin që SARS-CoV-2 ka shpëtuar aksidentalisht nga një laborator. Shkencëtarët më parë i kanë thënë revistës "Nature" se virusi ka të ngjarë të ketë kaluar nga lakuriqët e natës tek njerëzit, ndoshta përmes një kafshe të ndërmjetme por përcaktimi i saktë nuk dihet.

Anëtari tjetër, Hung Nguyen, një studiues i mjedisit dhe sigurisë së ushqimit në Institutin Ndërkombëtar të Kërkimit të Blegtorisë në Nairobi, do të kontribuojë në njohuritë e tij se si patogjenët përhapen në tregjet e lagështa, të ngjashme me tregun e prodhimeve të detit Huanan në Wuhan. Nguyen ka hetuar se si Salmonella dhe bakteret e tjera  që përhapen nëpër ferma të vogla, thertore dhe tregje të kafshëve të gjalla në vendin e tij të lindjes në Vietnam dhe në të gjithë Azinë Juglindore.
Gjithashtu në ekip është Peter Daszak, presidenti i organizatës hulumtuese jofitimprurëse Ecohealth Alliance në New York City, i cili ka kaluar më shumë se një dekadë duke studiuar koronavirusët. Ai ka punuar ngushtë me Institutin e Virologjisë Wuhan (WIV) për të provuar lakuriqët e natës për koronavirusët me potencial për të kaluar tek njerëzit.
"Është një nder të jem pjesë e kësaj skuadre. Nuk ka pasur një pandemi në këtë shkallë që nga gripi i vitit 1918 dhe ne jemi akoma mjaft afër origjinës për të zbuluar më shumë detaje se nga ka ardhur," thotë Daszak.


Një anëtar tjetër i ekipit, Fabian Leendertz, një veteriner në Institutin Robert Koch në Berlin, do të sjellë ekspertizën e tij në raste të ngjashme të kalimit të viruseve tek njerzit.
"Një kohë e konsiderueshme ka kaluar që nga shfaqja e COVID-19 dhe shumë njerëz kanë vetëm simptoma të lehta ose aspak, gjë që do ta bëjë të vështirë të identifikosh personin e parë të infektuar.Ne jemi të gjithë të vetëdijshëm se nuk ka asnjë garanci se do të ketë një histori të papërshkueshme nga uji se si filloi gjithçka,"thotë Leendertz.
Anëtarët e tjerë të ekipit përfshijnë studiues nga Danimarka, Mbretëria e Bashkuar, Australia, Rusia dhe Japonia. Por Christian Drosten, një virolog në spitalin Charité në Berlin, vë në dukje se ftesat për të aplikuar për ekipin u dërgoheshin vetëm anëtarëve të Rrjetit Global të Ndihmës dhe Përgjigjes së OBSH-së (GOARN), një grup i mbyllur me përvojë në përgjigjen e shpërthimit.
"Shumë studiuesve me ekspertizë përkatëse nuk iu dha mundësia për të aplikuar.Ata mund dhe duhet ta kishin lëshuar këtë si një thirrje më të hapur,"thotë Drosten, i cili mori e-mailin, por e humbi ftesën ndërsa ishte me pushime.
Angela Rasmussen, një virologe në Universitetin Georgetown, e cila është e vendosur në Seattle, Washington tha se ekipi është shumë i kualifikuar,  por 8 në 10 anëtarë janë burra dhe studiuesit nga Evropa dominojnë grupin dhe asnjë nuk është nga Afrika ose Amerika e Jugut. Ajo gjithashtu thotë se lidhjet e Daszak me WIV mund të krijojnë një konflikt interesi, duke qenë se laboratori ka qenë në qendër të pretendimeve të pabazuara se virusi rastësisht ka ardhur prej andej.
Daszak thotë se ai ka qenë transparent për punën e tij në Kinë. Besimi që ai ka ndërtuar me studiuesit atje do ta ndihmojë ekipin të fitojë një kuptim më të thellë të ditëve të para të pandemisë.  Ekipi pritet të udhëtojë në Kinë për disa javë.
Burimi:Nature/Përktheu:Gazeta "Si"


Copyright © Gazeta “Si”




Më Shumë