Nisin hetimet për shpërthimin tragjik në Lushnjë, forca policore dhe ekspertë teknikë edhe sot në vendngjarje

Gazeta Si - Një ditë pas shpërthimit tragjik në Lushnjë, ku humbën jetën babë e bir, vendi i ngjarjes është ende i rrethuar nga forca të shumta policie.

Këtë të shtunë, kanë mbërritur prokurorë nga Prokuroria e Fierit, Agjencia Antieksploziv, përfaqësues nga OST-së dhe Inspektoriati i Punës, të cilët kanë nisur hetimet.

Sipas burimeve, grupi hetimor, ka konstatuar dy vepra penale. Shkelja e rregullave të punës lidhet me bombolat që përdoreshin për saldim që ishin jashtë çdo kriteri teknik dhe shpërdorimi i detyrës, që lidhet me dhënien e lejes për këtë magazinë poshtë linjës së tensionit të lartë. Hetimi në vendngjarje vijon, ndërsa policia ende nuk ka dalë me reagim zyrtar për veprat e mësipërme.

Roland Hoxha dhe i biri, Lidio ishin duke punuar në vinç, ku me ndihmën e tij ngrinin 2 bombola oksigjeni me të cilat po kryenin saldime në pjesën e tarracës.

Dyshohet se gjatë punës një bombol u shkëput nga vinçi dhe u përplas në tokë duke shkaktuar një shpërthim që shkatërroi gjithçka dhe mori jetën e të dyve.

Nga fuqia shpërthyese u shkëputën telat e tensionit të lartë 110 kv që kalonin sipër magazinës që po ndërtohej nga deputeti i Partisë Socialiste prej 2 mandatesh në Lushnjë Bujar Çela, i cili mbeti i plagosur së bashku me gjashtë persona të tjerë të cilët kanë qenë duke punuar në magazinën e tij.

Në vendin e ngjarjes ndodhen edhe ekspertë nga Inspektoriati Shtetëror Teknik dhe Industrial, Policia e Lushnjës dhe inxhinierë të OShEE-së.

Siç duket edhe në video, nga shpërthimi janë shkaktuar dëme të shumta edhe në ndërtesat aty pranë. Ndërkohë, bombola e paplasur e gazit ende nuk është hequr nga vendi i ngjarjes.

Sa i përket të lënduarve, të katër të plagosurit e shtruar në spitalin e Lushnjës janë në gjendje të mirë shëndetësore dhe jashtë rrezikut për jetën.

Si pasojë e shpërthimit të djeshëm humbën jetën Roland Hoxha dhe djali i tij Elidon Hoxha, babë e bir.

Roland Hoxha 55-vjeç alias Landi Verçani (ka ndërruar identitetin për shkak të dokumentacionit), humbi jetën në vendngjarje, ndërsa djali i tij Elidoni ka ndërruar jetë, ndërsa po transportohej drejt spitalit të Traumës në Tiranë.

Ndërkohë që i plagosur ka mbetur edhe deputeti Bujar Çela, i cili i është nënshtruar një ndërhyrjeje kirurgjikale, por sipas mjekëve është jashtë rrezikut për jetën.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.