.png)
Nga Gazeta “SI”- Diskutimi më i madh i këtyre ditëve në hapësira publike shqiptare, fizike apo jo, ka qenë mungesa e njerëzve në qytetet jugore të vendit, ata që janë sinonim i sezonit turistik në vend.
Operatorët turistikë në vend, pa hezitim, thanë fajtorin: çmimet e larta.
“Ndëshkimi më i madh na vjen nga rritja e çmimeve”, pohojnë ata për gazetasi.al duke shtuar se kjo problematikë është më e madhe edhe se mungesa e 10 mijë punëtorëve që i mungojnë aktualisht sektorit.
Sipas tyre, pritshmëritë janë rrëzuar dhe panorama për muajin gusht është e zymtë.
Por, sektori turistik nuk është i vetmi që po reagon ndaj inflacionit të lartë në vend.
Për muajin qershor, inflacioni ishte 7.4%, ku peshën më të madhe e kanë patur ushqimet dhe pijet joalkoolike bashkë me transportin, i cili në raport vjetor ka pasur rritjen më të madhe, prej rreth 30%.
Ushqimet zënë 42% të buxhetit të një familje duke i bëre ata më të brishtë ndaj rritjes së çmimeve.
Sipas raportit të sapopublikuar të OKB-së, kriza e çmimeve në muajt e fundit ka shtuar 90 mijë të varfër “të rinj”, në Shqipëri, të cilët jetojnë me 5.5 dollarë në ditë.
Thirrj e vazhdueshme e ndërkombëtarëve drejtuar qeverisë shqiptare ka qenë pikërisht ndihma ndaj shtresave më vulnerabël, sepse siç shpjegon “The Economist”, të varfërit janë ata që ndjejnë inflacionin më të lartë.
Rritja e kostos së transportit lidhet drejtëpërdrejtë me rritjen e çmimit të naftës. Ndonëse në vendin tonë, është ngritur një Bord për kontrollin e çmimit të hidrokarbureve, ato vazhdojnë të jenë më të lartat në historinë e Shqipërisë.
Nga vendimi i fundit i Bordit të Transparencës, u vendos që nafta të shitej me 238 lekë/litër.
Sektori i bujqësisë, po dëmtohet po ashtu nga rritja e çmimit të naftës dhe sidomos plehrave kimike. Fermerët pohojnë se kompanitë, po i shesin plehrat kimike me çmime 10 herë më të larta nga më parë. Ndërkohë, prodhimet e tyre shiten poshtë vlerës së caktuar.
Por vala e rritjes së çmimeve ka prekur dhe sektorin e argëtimit. Lokalet, restorantet dhe klubet e natës, kanë rritur tarifat e tyre. Madje, klubet e natës kanë rikthyer pagesën vetëm për hyrjen, nga 5-10 euro/personi.
Kjo ka sjellë dhe rënien e konsumit në këto vende.
Rënia më e madhe e konsumit po vihet re nëpër restorante, aty ku rritja e çmimeve të lëndëve të para u reflektua shpejt, sipas Enri Jahaj, Kreu i Shoqatës së Bareve dhe Restoranteve.
“Çmimet e produkteve ushqimore janë rritur deri në 40% dhe kryesisht vaji i cili përdoret gjerësisht në këtë sektor. Është e kuptueshme që konsumi do të ulet sepse njerëzit në situata të tilla priret të kursejnë. Sot blerësit shohin me vëmendje faturat e ushqimeve të tyre pasi ka rritje të secilit produkt”, thotë ai për Gazetasi.al duke shtuar se kjo do të jetë një tjetër goditje për sektorin e shërbimeve pas pandemisë e cila e uli ndjeshëm konsumin në këto struktura.
Berberët dhe parukierët kanë rritur çmimet e shërbimeve të tyre me 20-40%. Ata pranuan për gazetën “SI”, se “këtë ka bërë gjithë Europa dhe çmimet janë rritur për këdo”.
Ndërkohë, në matjet e Numbeo, mbi indeksin e kostos së jetesës, rezulton se kjo kosto është rritur nga janari në qershor në vendin tonë.
Në janar 2022, kostoja mesatare për një familje me 4 persona ishte 167.8 mijë lekë, pa përfshirë qiranë, ndërsa në qershor është 200.8 mijë lekë.
Kostoja e raportuar në janar, për një person të vetëm, në një muaj, ishte 47.8 mijë lekë dhe 5 muaj më vonë, 56.9 mijë lekë pa përfshirë qiranë.
Ndërkohë rritje të tjera, si ajo e metrit katror të banesave dhe qirave të tyre, nisën rritjen që pas pandemisë dhe nuk kanë ndalur ende, por tashmë, rritja do të vazhdojë në grup, edhe për elementët e tjerë.
Mesa duket, fuqia blerëse në Shqipëri do të vazhdojë të jetë e fundit në Europë, edhe për këtë vit, ose dhe më gjatë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
