Kevin Durant është rikthyer. Jo vetëm në fushë, ku ka pasur një fillim të sezonit të jashtëzakonshëm me Bruklin, pas një viti e gjysmë ndalesë për shkak të dëmtimit të tendinës së Akilit. Ai është kthyer edhe në zemrën e tifozëve. Durant është lojtari më i votuar nga fansat në fazën e parë të preferencave të tyre për titullarët e “All Star Game” (ndeshjes së yjeve).
Durant është lojtari i vetëm që ka kaluar 2.3 milionë vota. Ai është rreth 14 mijë vota para LeBron Xhejmsit. Lojtari i Lejkërsave është më i votuari në Konferencën e Perëndimit, ku bën pjesë edhe Stef Kerri. Ndër preferencat e çuditshme të tifozëve, në vend të 10-të, është Klai Tompson.
Ja dhe titullarët provizorë të 5-sheve, pas fazës së parë të votimit nga tifozët:
Lindja: Bredli Bill (Uashington), Kiri Irving (Bruklin), Kevin Durant (Bruklin), Janis Antetokounmpo (Milluoki), Xhoel Embid (Filadelfia)
Perëndimi: Stef Kerri (Golden Stejt), Luka Donçiç (Dallas), LeBron Xhejms (Lejkërs), Nikola Jokiç (Denver), Kauhi Leonard (Klipers)
Procesi i përzgjedhjes së 5-sheve të Lindjes dhe Perëndimit është paralajmëruar nga NBA-ja para se shoqatat dhe lojtarët të shpreheshin, nëse duhet luajtur vërtet ndeshja e yjeve apo jo. Me shumë mundësi, ky event do të organizohet të dielën e 7 marsit në Atlanta, pavarësisht pandemisë.
Tifozët mund të vazhdojnë të votojnë për lojtarët e preferuar deri më 17 shkurt. Dy skuadrat do të zbulohen një ditë më pas, me votën e tifozëve, gazetarëve dhe lojtarëve. Rezervat, siç është traditë, do të zgjidhen nga trajnerët e çdo konference dhe emrat do të bëhen të ditur më 23 shkurt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
