.png)
Ndeshja Oklahoma City-Utah është shtyrë për shkak të Koronavirusit, Rudi Gobert i skuadrës mike ka rezultuar pozitiv me virusin COVID-19. Menjëherë më pas ka ardhur njoftimi zyrtar nga drejtuesit e NBA-së për pezullimin e sezonit 2019-20. Një moment i trishtuar dhe historik 11 marsi i 2020-ës, që do të kujtohet për shumë kohë, për arsye të gabuara.
Komunikata zyrtare është e shkurtër. “NBA pezullon sezonin pas ndeshjeve të fundit. Bëjmë me dije se një lojtar i Utah Jazz ka rezultuar pozitiv me COVID-19. Përgjigjet e testit janë zbuluar pak para ndeshjes Oklahoma City-Utah Jazz. Ndeshja është shtyrë, ndërsa lojtari nuk ka qenë në sallë. Gjatë pauzës do të mendohet për hapat që do të ndiqen në raport me pandeminë e Koronavirusit”.
NBA-ja ishte gati të merrte vendimin për të luajtur me dyer të mbyllura për të mos përhapur virusin, por lajmi zyrtar i prekjes së Gobert nga Koronavirusi ka sjellë pezullimin e menjëhershëm të sezonit. Sigurisht, basketbollisti francez i Utah Jazz nuk e ka ditur që ka qenë i infektuar. Për momentin, nuk është e qartë se çfarë do të ndodhë në vazhdim me NBA-në, por i sigurt është pezullimi të paktën dyjavor i kampionatit, kohë e nevojshme për të futur në karantinë skuadrat që kanë luajtur kundër Utah.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
