Gazeta Si - Në Kolumbi, katër fëmijë që i mbijetuan një aksidenti me një avion të vogël që ndodhi më 1 maj në xhungël në pyllin Guaviare në departamentin e Caquetà, u gjetën të gjallë pas 40 ditësh.
Kjo është ajo që raportohet nga gazeta “El Tiempo”, duke e cilësuar gjetjen "një mrekulli".
"Ne i gjetëm të gjithë të gjallë", - i tha ushtria qeverisë kombëtare. Katër vëllezërit e vegjël, të moshës 13, 9, 4 vjeç dhe 11 muajsh, i mbijetuan një aksidenti ajror, ku humbën jetën tre persona (dy pilotë dhe një grua).
Ekipet e shpëtimit kishin gjetur të dhëna nga fëmijët në pyll, duke përfshirë gjurmët e një kasolleje me gjethe dhe gjurmët e fundit të këpucëve.
Më 1 maj, Forcat Ajrore Civile Kolumbiane raportuan se një avion i vogël kishte raportuar vështirësi fluturimi përpara se të humbiste koordinatat.
Pas gjashtëmbëdhjetë ditësh kërkime, autoritetet gjetën avionin, një “Cessna 206”, të bllokuar në xhungël. Pak më parë ishin gjetur trupat e pajetë të tre të rriturve. Të miturit, do të kishin arritur të mbijetonin duke u ushqyer me fruta dhe perime të pyllit.
Përveçse mori një vëmendje të madhe mediatike, rasti i vëllezërve Mucutuy u bë shkak edhe për një polemikë të çastit politik.
Më 18 maj, presidenti i Kolumbisë, Gustavo Petro, kishte fshirë një mesazh nga profili i tij në Twitter, ku jepte llogari për gjetjen e të miturve.
“Kam vendosur të fshij mesazhin për faktin se informacioni i marrë nga ICBF (Instituti Kolumbian i Mirëqenies së Familjes) nuk mund të konfirmohej. Më vjen keq për atë që ndodhi”, ka shkruar Petro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.