Modeli i zgjedhur nga Japonia për përballimin e koronavirusit lëvdohej deri pak javë më parë, si një prej rrugëve më të suksesshme për të frenuar pandeminë.
Shifrat i justifikonin këto lëvdata. Deri më 17 mars, Japonia numëronte pak më shumë se 1500 persona të infektuar, ky gjysma e tyre ndodhej në anijen “Diamond Cruise”, të bllokuar në portin e Yokohamas.
Në atë kohë u tha se çelësi i suksesit qëndronte tek testimi. Në vend të testimit masiv të popullsisë, siç bëri Italia dhe Korea e Jugut në zonat e prekura, Japonia vendosi që të përqëndrohej më fort tek gjurmimi i kontakteve të rasteve që konfirmoheshin dhe më pas izolimi i tyre për të shkëputur zinxhirin e transmetimit.
Ky ishte vendimi i një komisioni ekspertësh të ngritur në Ministrinë e Shëndetësisë në Japoni, që sipas sistemit politik vendas merr fuqi të plota, duke mënjanuar kështu edhe pushtetin e Kryeministrit Shinzo Abe.
Abe është shfaqur hera-herës partizan i testimeve masive, por kërkesat e tij janë penguar nga Ministria e Shëndetësisë. Por, tani duket se modeli japonez dështoi. Në vend është raportuar një rritje e frikshme e rasteve të reja me koronavirus, aq sa vendi pritet që të shpallë gjendjen e emergjencës ditën e martë.
Agjencia e japoneze e lajmeve “Jiji Press” thotë se Shinzo Abe do të mbledhë pasditen e së hënës kabinetin qeveritar për të shpallur gjendjen e emergjencës. Masa pritet që të përfshijë edhe Tokion dhe Osakan, dy prej rajoneve më të mëdha të vendit.
Gjendja e emergjencës do të shpallet mbi bazën e një kuadri të ri ligjor, që u miratua së fundmi nga parlamenti vendas, e sipas të cilit Kryeministri Shinzo Abe do të ketë më shumë pushtet, duke kontrolluar edhe komisionin e ekspertëve të Ministrisë së Shëndetësisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.