.png)
Gazeta Si - Sipas disa zyrtarëve të qeverisë amerikane të cituar nga prestigjiozja "Financial Times", Kina po heton ministrin e saj të Mbrojtjes, ish-oficerin e marinës, Dong Jun, për korrupsion.
Aktualisht është e paqartë se cilat janë saktësisht akuzat ndaj tij dhe ambasada kineze në Shtetet e Bashkuara të Amerikës nuk ka komentuar.
Një nga burimet me të cilat foli “Financial Times”, tha se Dong Jun po hetohet si pjesë e hetimeve më të gjera të urdhëruara nga presidenti kinez Xi Jinping ndaj zyrtarëve të Ushtrisë Çlirimtare Popullore, emri zyrtar i ushtrisë kineze. Dong Jun do të jetë ministri i tretë kinez i Mbrojtjes radhazi që do të hetohet për korrupsion.
Ai u zgjodh si ministër në dhjetor 2023, pas shkarkimit nga detyra të Li Shangfu, i cili nuk ishte parë në publik për disa muaj.
Li më pas u përjashtua nga Partia Komuniste së bashku me paraardhësin e tij, Wei Fenghe, për shpërdorim të pozitës së tyre dhe pranimin e dhuratave dhe parave në këmbim të favoreve për njerëzit e tjerë.
Megjithatë, këtë të mërkurë, në Pekin, zëdhënësi i Ministrisë së Jashtme tha se artikulli i “Financial Times” përmban vetëm "spekulime dhe ndjek hijet".
Megjithatë, diplomacia kineze nuk është gjithmonë e informuar në kohë reale për operacionet e kryera nga organet e plotfuqishme mbikëqyrëse të Partisë.
Këtë e demonstron historia e ministrit të Jashtëm, Qin Gang, i cili u zhduk “në ajër” në qershor 2023: për javë të tëra zyra e tij pretendonte se mungesa e tij ishte për arsye shëndetësore.
Vetëm një muaj më vonë, me një deklaratë me dy rreshta, Pekini njoftoi largimin e tij. Dong Jun u shfaq në publik javën e kaluar në një konferencë sigurie të mbajtur në Laos: me atë rast, ministri refuzoi një takim ballë për ballë me shefin e Pentagonit Lloyd Austin, duke justifikuar vrazhdësinë me pakënaqësinë kineze me furnizimet me armë amerikane në Tajvan.
Prandaj, do të duhet të shohim nëse Dong do të kthehet në qendër të vëmendjes në ditët e ardhshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
