Miluoku Baks e ka realizuar shumë shpjet hakmarrjen ndaj Boston Sëlltiks. Pas humbjes në ndeshjen e parë gjysmë finale, Baks kanë reaguar në ndeshjen e dytë, duke fituar thellë 123-102. Në ndeshjen e tjetër të çerekfinaleve të play off-it të NBA Golden Stejt ka vazhduar marshimin ndaj Hjuston Rokets. Edhe në sfidën e dytë kampionët në fuqi nuk lëshuan pe, por mposhtën ekipin që besohej se do të bënte një rezistencë më të fortë në këto finale të play off-it.
Sfida e zhvilluar në “Fiserv Forum” ka parë një Miluoki Baks në versionin e tij më të mirë. Me Antetokounmpo në super formë çdo gjë bëhet më lehtë. Basketbollisti grek realizoi 29 pikë, 4 asist dhe 10 ribaund, duke u ndihmuar gjithashtu edhe nga Midëllston dhe Bledsoi që zhvilluan një ndeshje shumë të mirë. Tashmë ndeshjet shkojnë në barazim 1-1 dhe çdo gjë është e hapur për ekipin që do të avancojë në finalen e Konferencës së Lindjes.
Golden Stejt në fazën finale të sezonit po tregon formën e tij më të mirë. Ekipi kampion në fuqi fitoi edhe në ndeshjen e dytë gjysmëfinale me Hjuston Rokets edhe pse nuk ishte aspak e lehtë. Ashtu si në ndeshjen e parë, Rokets bën rezistencë të fortë, por Durant i mbështetur nga Tomson ishte në formë të shkëlqyer. 112-109 u mbyll kjo ndeshje, me Hjuston që tregoi se nuk ka ndërmend të dorëzohet lehtë, por ka vështirësi që të fitojë, pasi në shumë raste ylli i ekipit Harden është i vetëm. Me këtë fitore, rezultati i përgjithshëm i këtyre ndeshjeve shkon në 2-0 në favor të Uorriërs.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.