.png)
Presidenti Ilir Meta i ka rikthyer Kuvendit ndryshimet e bëra në dhjetor të vitit të kaluar në ligjin për taksat kombëtare, duke deklaruar se këto ndryshime shkelin barazinë përpara ligjit, janë jotransparente dhe favorizojnë shfrytëzuesit e minierave.
“Në përfundim të shqyrtimit të këtij ligji, konstatohet se ky ligj bie në kundërshtim me parimet dhe dispozitat kushtetuese që mbrojnë sigurinë juridike, lirinë ekonomike, barazinë para ligjit, autonominë e pushtetit vendor, si dhe dëmton hapur interesin publik dhe pasurinë kombëtare”, thotë Presidenti.
Meta ka rrëzuar argumentimin e Qeverisë, që i ka justifikuar këto ndryshime si nevojë për të mbështetur industrinë e nxjerrjes së mineraleve në këtë situatë pandemie.
“Situata pandemike, e cila vazhdon ende, ka sjellë efekte negative në secilën fushë të ekonomisë dhe në secilin subjekt operues në tregun e lirë në vend dhe mbarë botën. Kjo situatë trajtohet në mënyrë të vazhdueshme nga ekspertët e ekonomisë me qëllim përballimin e pasojave të rënda dhe ardhjen në ndihmë si për bizneset e investitorët, ashtu edhe për qytetarët”, thotë Meta.
Ndërhyrja në ligjin për taksat kombëtare u bë nga Kuvendi në seancën plenare të 17 dhjetorit, me qëllim përjashtimin nga taksa e rentës minerare për mineralet që përpunohen në vend dhe eksportohen në formën e nënprodukteve minerare, si ferrokromi, koncetratet e kromit dhe të bakrit. Falja e kësaj taksa parashikohet deri në vitin 2023, ndërsa për 2024 përcaktohet ulja në masën e një të tretës së saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
