Më shumë se gjysma e Policisë së Shtetit e angazhuar për sigurinë në zgjedhje

Policia e Shtetit bëri më dije masat e marra në lidhje me mbarëvajtjen e procesit zgjedhor, që nga votimi, transporti i materialeve zgjedhore e deri tek procesi i numërimit.

Në total janë 7519 efektivë të Policisë së Shtetit që mes fushatës, ditës së zgjedhjeve dhe më pas procesit të numërimit janë të përfshirë në garantimin e sigurisë dhe qetësisë.

Për sigurimin e 5.199 Qendrave të Votimit dhe 92 vendeve të numërimit të votave, policia thotë se janë bërë përllogaritjet e punonjësve të Policisë, për transportimin me automjete, pajisje, armatim, radio-komunikim, ushqime e deri tek votimi i këtyre efektivëve.

Ditën e zgjedhjeve do të jenë 5.427 punonjës të policisë që do të angazhohen me shërbim për ruajtjen e objekteve zgjedhore në të gjithë Shqipërinë, si qëndrat e votimit dhe qëndrat e numërimit, si dhe 535 automjete për transport.

Ministria e Brendshme dhe ajo e Mbrojtjes kanë nënshkruar urdhrat përkatëse që u kalojnë përgjegjësinë e sigurisë së 74 objekteve të rëndësisë së veçantë tek ushtria, që do të ruhen nga forcat “Komando”.

Policia thotë se deri më datën 21 prill ka regjistruar 30 referime për ndjekje penale në Prokurori që lidhen me krimet zgjedhore. Sipas njoftimit, të policisë pjesë më e madhe e këtyre referimeve lidhet me akuzat e shit-blerjes së votës.

Policia thotë se bashkëpunimi me institucionet ndërkombëtare të OSCE/ODIHR, të cilat monitorojnë zgjedhjet ka qenë i përhershëm dhe përgatitjet për mbarëvajtjen e procesit zgjedhor kanë nisur që në muajin dhjetor.

Policia thotë se ka ngritur dhe funksionon grupi i drejtimit në nivel qendror për menaxhimin e masave të sigurisë për procesin zgjedhor, me qëllim vlerësimin e çdo informacioni nga të gjithë burimet, verifikimin, analizimin dhe ndjekjen e tij.

Në fund, duke kujtuar se pas mesnatës dhe gjatë ditës së zgjedhjeve është heshtja zgjedhore, Policia thotë se është e vendosur që të garantojë kontroll të plotë të territorit, që do të reagojë ligjërisht dhe proporcionalisht duke përdorur të gjithë kompetencat e saj institucionale dhe forcën ligjore ndaj kujtdo që kërcënon, intimidon apo shkel ligjin apo tenton të shesë votën dhe do të krijojë të gjitha kushtet që qytetarët shqiptarë të votojnë të lirë dhe të qetë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.