Gazeta Si – Spanja, kundërshtar në grup i Shqipërisë në Europianin e Gjermanisë, ka rinovuar kontratën me trajnerin Luis de la Fuente. Ai do të qëndrojë në krye të kombëtares iberike deri në 2026-ën, kur luhet Botërori në Meksikë, Kanada dhe SHBA.
Federata Spanjolle e Futbollit ka firmosur propozimin e drejtorit teknik, Albert Luke, për rinovimin e trajnerit aktual edhe për dy vite të tjera, përtej Europianit të qershorit.
De La Fuente e ka marrë drejtimin e Spanjës që prej 8 dhjetorit 2022, kur zuri vendin e Luis Enrikes. Në kontratën e tij fillestare kishte një klauzolë për zgjatjen e marrëveshjes deri në 2026-ës.
Spanja, fituese e edicionit të fundit të Ligës së Kombeve, bën pjesë në të njëjtin grup të Europianit të Gjermanisë me Shqipërinë, Italinë dhe Kroacinë. Me kuqezinjtë Spanja do të luajë ndeshjen e tretë në grup. Trajneri spanjoll tashmë mund të punojë më i qetë për Europianin e qershorit, pasi ka kontratën që dëshironte.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.