Disa dhjetëra banorë të lagjes “Emin Matraxhiu” në Elbasan, kanë protestuar mëngjesin e kësaj të premteje për bllokimin që bashkia i ka bërë nyjës që ata e përdorin për të hyrë dhe për të dalë nga zona e tyre.
Gjatë protestës, ata bllokuan për disa minuta edhe qarkullimin në unazën juglindore të qytetit, që është dhe pjesë e aksit nacional që lidh juglindjen e vendit me Tiranën dhe Durrësin.
Sipas bashkisë, bllokimi i nyjës u bë, pasi ishte mjaft e rrezikshme dhe ishte premisë për aksidente, duke orientuar daljen e banorëve në një tjetër rrugë pranë kodrës së Krastës.
Por kjo zgjidhje u kundërshtua nga banorët, të cilët kanë deklaruar vijimin e protestave, derisa në këtë nyje të bëhet një zgjidhje tjetër me mbikalim ose nënkalim për ta.
Banorët bllokuan rrugën pa një lajmërim në polici, pasi sipas tyre edhe ata nuk u njoftuan nga autoritet për bllokimin.
Ata u shprehen se nuk janë kundër rritjes se masave të sigurisë, por se duhet të krijohen rrugë alternative, pasi për t’u lidhur me Elbasanin apo dërguar fëmijët në shkollë u duhet të përshkojnë më shumë se 4 km. Më pas rruga u zhbllokua me ndërhyrjen e policisë së Elbasanit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.