Masat e ngrohta të rrymave ajrore që po përhapen nga Afrika në Mesdheun Qendror e Lindor por edhe në Europën Veriore, do të rezultojnë në mbizotërimin e temperaturave shumë të larta të paktën deri të dielën, 27 qershor.
Sipas Institutit Shqiptar të Gjeoshkencave të mërkurën temperaturat minimale dhe maksimale të ajrit pritet të arrijnë:
në bregdet: 25 / 32 °C
në vendet e ulëta: 23 / 38 °C
në vendet malore: 17 / 33 °C
Tendenca e temperaturave do të vijojë të jetë në rritje edhe të enjten.
Ndërkohë mediat greke kanë publikuar edhe hartën e të nxehtit afrikan që është përhapur nëpër Europë. E prekur nga këto rryma të nxehta është edhe Shqipëria, ndërsa ato shtrihen deri në vendet skandinave por edhe në Rusi.
Në disa vende, kushtet e nxehtësisë do të mbizotërojnë, ndërsa, për shkak të erërave të dobëta, temperaturat do të shkojnë tepër të larta.
Sipas të dhënave të parashikimit të Observatorit Kombëtar Grek, temperaturat maksimale në rajonin tonë pritet të arrijnë 38-39 gradë, ndërsa lokalisht mund të arrijë mbi 40 gradë Celsius.
Përveç temperaturave shumë të larta, stuhi dhe breshër lokal nuk do të mungojnë pasditeve.
Theksohet se, për shkak të temperaturave të larta të pritshme, duhet të respektohen masat e nevojshme paraprake, veçanërisht nga ata që kanë probleme shëndetësore, të tilla si pirja e sasive adekuate të ujit, shmangia e alkoolit, vaktet e rënda dhe ushtrimet e forta, mbajtja e qetësisë, dushe e rregullta dhe komunikimi i shpeshtë me të moshuarit që jetojnë vetëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
