Komiteti Teknik i Ekspertëve la në fuqi masat kufizuese për të frenuar përhapjen e infeksionit Sars-Cov-2, ndërsa për herë të parë u konfirmua zyrtarisht prania e variantit britanik të koronavirusit. Ministrja e Shëndetësisë Ogerta Manastirliu tha se në javën e parë të marsit është vënë re një tendencë e rënies së infektimeve, ndërkaq është konfirmuar nga Instituti i Shëndetit Publik në Turqi ku u dërguan mostrat për analiza, se në Shqipëri prej periudhës janar-shkurt qarkullon edhe varianti britanik i COVID-19.
Ndërsa drejtoresha e ISHP Albana Fico shpjegoi se rastet vijojnë në 405 për 100 mijë banorë nga 515 që ishte dy javë më parë. "Mesatarja e rasteve ditore siç e vëmë re ka rënë ka rënë tek 819 nga 899", tha ajo. Për sa i përket raportit meshkuj-femra, Fico shpjegon se ka më shumë femra që preken nga virusi se meshkuj, por meshkujt janë më të shumtë në numër sa i përket fataliteteve në raportin 52-48%. Sipas Ficos çelësi i fatalitetit vazhdon të mbetet tek 1.7, ka një tendencë për uljen e pozitivitetit të mostrës.
Më tej anëtarja e Komitetit Teknik të Ekspertëve, mjekja pediatre-infeksioniste Gjeorgjina Kuli-Lito ka folur për situatën e COVID-19 tek fëmijët . Sipas mjekes nga fillimi i pandemisë janë regjistruar 3500 raste pozitive, nga të cilët 5% me komplikacione dhe që kanë kërkuar ndihmë spitalore.
“Të regjistruar që nga fillimi i epidemisë kemi rreth 3500 raste pediatrike pozitive prej të cilëve vetëm 5% kanë kërkuar ndihmë spitalore, pra që kanë paraqitur komplikacione të aparatit respirator apo komplikacionin e përshkruar dhe në vende të tjera të botës siç është përgjigje inflamatore multisistemike. Kemi kapacitete të lira për hospitalizimin e fëmijëve në qoftë se do të jetë e nevojshme dhe po kështu skenarë në vazhdimësi për të ndihmuar në raste të kërkesës së rritur për hospitalizim”, tha ajo.
MASAT KUFIZUESE QE MBETEN NE FUQI
-Ndalimi i qarkullimit të lëvizjes për qytetarët nga ora 20:00 e mbrëmjes – 6:00 të mëngjesit, me përjashtim të emergjencave shëndetësore dhe për arsye pune (në këtë rast është e domosdoshme leja nëpërmjet aplikimit tek e-Albania.
– Ndalimi i aktiviteteve të bareve, restoranteve, klubeve, nga ora 20:00 e mbrëmjes – 06:00 të mëngjesit (me përjashtim të shërbimit delivery).
– Nisur nga rritja e rasteve të infektimeve të reja në grupmoshën 15-24 vjeç, shkollat e mesme vijojnë me skenarin e tretë, pra atë online ne zonat e riskut të lartë.
– Universitetet vijojnë online
– Pezullim të fluturimeve me Britaninë e Madhe
VAKSINAT
Ministrja Manastirliu tha se prej të hënës do të kemi dozat e radhës nga kontrata e Pfizer. "Kemi arritur në një numër pra vaksinimesh prej 21 mijë e 619 doza vaksinash të kryera. Dhe kemi pothuajse përmbyllur vaksinimin e stafit shëndetësor. Më shumë se 16 mijë të vaksinuar. Më shumë se 4 mijë të kryer për të moshuarit plus 80 vjeç. Të moshuarit në shtëpitë e të moshuarit dhe stafet në shtëpitë e tyre,” tha Manastirliu.
Ndërkaq në mbledhjen e Komitetit u prezantuar dhe anëtarët e përhershëm të Komitetit Teknik të Ekspertëve, ku u shtuan edhe tre të rinj, pas largimit të Tritan Kalos dhe Najada Çomos. Ata janë:
-Dhimitër Kraja, shef i sëmundjeve infektive në QSUT, pedagog në Universitetin e Mjekësisë.
-Ermira Kola, ka përfunduar studimet në 1985 në fakultetin e mjekësisë, e specializuar në pediatri. Prej 1991 është pedagoge në universitetin e mjekësisë. Është autore dhe bashkë-autore në mbi 45 artikuj shkencorë.
-Alban Ylli, rreshton mbi 40 artikuj në revista shkencore, ndërkombëtare. Aktualisht pjesëtar i komitetit shkencor të Akademisë së Shkencave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.