Gazeta Si – Pronari i Napolit, ekipit kampion në fuqi të Italisë, pas një nate reflektimi ka vendosur për ndryshimin e dytë në stol. Valter Maxarri ka bërë më keq se Rudi Garsia në këtë periudhë që ka drejtuar ekipin.
Aurelio De Laurentis, presidenti i Napolit, ka vendosur të ndryshojë përsëri trajner. Për Maxarrin do të jetë sot stërvitja e fundit. I përzgjedhuri për të marrë vendin e tij është Françesko Kalcona, trajneri aktual i Sllovakisë, një skuadër e kualifikuar për në Europianin e Gjermanisë.
Kalcona ka qenë bashkëpunëtor i Mauricio Sarrit dhe Luçiano Spaletit te Napoli. Tani pritet që të mësohen detaje të tjera në lidhje me këtë ndryshim të radhës te Napoli. Ecuria e këtij sezoni ka qenë shumë larg pritshmërive për kampionët në fuqi, tashmë larg zonës së Championsit. Ata mbajnë vendin e 9-të me 36 pikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
