.png)
Gazeta Si - Ish-kreu i Kadastrës së Gjirokastrës, Florian Taçi, 45 vjeç, është arrestuar nën dyshimin për mashtrim dhe falsifikim dokumentesh në bashkëpunim.
Ishte një operacion i përbashkët i koordinuar mes Policisë së Tiranës asaj të Gjirokastrës, Prokurorisë dhe Gjykatës së Faktit Gjirokastër që finalizuan aksionin për arrestimin e Taçit dhe ish-bashkëpunëtorit të tij në Kadastrën e Gjirokastrës, Alban Memishaj, 37 vjeç.
Dyshohet se në bashkëpunim me njëri-tjetrin, Taçi dhe Memishaj kanë falsifikuar dokumentet e disa pronave, duke përdorur vulën e një subjekti të palicencuar nga organet kompetente.
“Specialistët për Hetimin e Krimeve Ekonomiko-Financiare arrestuan në flagrancë shtetasit, 45 vjeç dhe 37 vjeç, të dy banues në Gjirokastër, pasi dyshohet se në bashkëpunim me njëri-tjetrin, kanë falsifikuar dokumentet e disa pronave, duke përdorur vulën e një subjekti të palicencuar nga organet kompetente”, - njofton policia.
Sipas burimeve, që të martëm në mbrëmje, policia ushtroi kontroll në zyrën e tij avokatore në Gjirokastër, ku sekuestruan dokumente të shumta që i shfrytëzonte Taçi, të cilat kishin të bënin me të gjithë databazën e Kadastrës së Gjirokastrës. Njëkohësisht, Taçi kishte akses në këtë databazë online.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
