Nga Gazeta Si- Ndarja e Leka Zogu II dhe Elia Zaharia u soll në vëmendje pas një konflikti mes tyre që degjeneroi deri në dhunë fizike dhe shkoi në dyer të gjykatave për urdhër mbrojtje nga të dyja palët.
Zyrtarisht, tashmë gjykata ka vendosur zgjidhjen e martesës së tyre.
Sipas gjykatës zgjidhja e martesës është e dakordësuar nga të dy, por gjithsesi do të duhen 15 ditë që ky vendim të marrë formë të prerë.
Në vendim thuhet se Elia Zogu do të mbaje mbiemrin që ka patur para martese “Zaharia” ndërsa është pranuar se zgjidhja e martesës do të bëhet në bazë të marrëveshjes së firmosur mes tyre më 15 janar 2024 që përcakton përfitimet pas divorcit si dhe takimet që Leka Zogu II do të ketë me të bijën Geraldinën.
LEXO EDHE:
-Zyrtarizohet ndarja e çiftit mbretëror / Princ Leka dhe Elia Zaharia njoftojnë se kanë nisur procedurat e divorcit
-Dy muaj pas ndarjes së ‘paqtë’, Princ Leka dhe Elia Zaharia padisin njëri-tjetrin për dhunë. I përfshirë në sherr edhe babai i aktores
-Sherri ‘mbretëror’ / Princ Leka merr 1 vit urdhër-mbrojtje nga vjehrri i tij. Shtyhet seanca për Elia Zaharian
-Gjykata vendos: Princ Leka dhe Elia Zaharia 6 muaj urdhër-mbrojtje dhe 5 metra larg njëri-tjetrit
Nga ky divorc Elia Zaharia do të përfitojë në një apartament 257 m2 i cili është në emrin e të bijës. Po ashtu artistja do të ketë në pronësi të plotë një dyqan 134 m2 si dhe një parking rreth 47 m2. Sipas kësaj marrëveshje të hartuar në janar të këtij viti, kur Geraldina të jetë në moshë madhore, Elia do të humbasë të drejtat mbi pronat në rast të krijimit të një marrëdhënieje të re martesore ose bashkëjetese.
Sipas marrëveshjes, Leka Zogu do të paguajë 1 mijë euro vlerë monetare mujore si detyrim ushqimor kundrejt vajzës Geraldinës. Kjo shumë përfshin shpenzimet për nevojat e përditshme të fëmijës dhe do të paguhet në llogarinë bankare të Elias.
Ndërkohë, vajza do të takohet çdo ditë me të atin 2 orë dhe do të shkojë në shtëpinë e tij në fundjavë.
Në gjykatë palët janë shprehur se arsyeja e divorcit është mungesa e komunikimit si dhe ndërprerja e bashkëjetesës.
Elia Zaharia dhe Leka Zogu janë martuar në vitin 2016 ne një ceremoni madhështore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
