Marokenët dhe shqiptarët të parët për përfitimin e nënshtetësive nga vendet e BE-së

Shqiptarët janë të dytët në Europë për përfitimin e nënshtetësisë në vendet e e BE-së, pas marokenëve për vitin 2019, 41 mijë të tillë.

Në total fituan shtetësinë mbi 706 mijë shtetas të huaj gjatë 2019-s, nga të cilët grupi më i madh i fitimit të kësaj të drejte ishin mbi 66 mijë marokenë. Grupi i dytë ishin shqiptarët, me 41 mijë dhe të tretët britanikët, me mbi 29 mijë persona.

Më shumë se 97% e shtetësive të reja për shqiptarët u dhanë nga Greqia dhe Italia vendet të cilat mbajnë një numër të lartë emigrantesh nga vendi ynë. Greqia u dha shtetësinë rreth 14 mijë shqiptarëve me 2019 dhe Italia shpalli qytetarë të saj rreth 26 mijë shqiptarë në të njëjtin vit.

Ndërmjet periudhës 2014 deri në 2019, numri i shtetësive të dhëna nga një shtet anëtar i BE-së ka ndryshuar nga 672.000 në 2018 dhe 844.000 në 2016. Në vitin 2019 u dhanë 706.000 shtetësi nga vendet BE-së. Marokenët përfituan 9% të të gjitha shtetësive të dhëna, shqiptarët 6% të totalit dhe qytetarët britanikë, 4% të totalit.

Gjatë periudhës 2014 deri në 2019, marokenët dhe shqiptarët ishin dy grupet më të mëdha që morën shtetësinë e një shteti anëtar të BE-së. Nga viti 2014 deri në 2018, qytetarët turq ishin grupi i tretë më i madh, por në vitin 2019 britanikët zunë vendin e tretë.

Vitet e fundit, emigracioni në vendet e BE është rritur ndjeshëm. Në vitin 2019, numri më i madh i personave që emigruan u regjistrua në Gjermani (886.000 persona, 21% e të gjithë emigrantëve në BE në Spanjë (750.000 ose 18% e totalit) dhe Francë (386.000 ose 9 % e totalit).

Emigrantët në këto tre shtete anëtare përbënin pothuajse gjysmën e të gjithë emigrantëve që hynë në shtetet anëtare të BE-së në vitin 2019. Në vitin 2019, mbi gjysma e emigrantëve kishin nënshtetësinë e një vendi të huaj (brenda ose jashtë BE) në 23 midis 27 Shteteve Anëtare.

Nga ana tjetër, njerëzit po largohen gjithashtu nga Shtetet Anëtare të BE -së ose në një shtet tjetër anëtar të BE -së ose jashtë BE -së. Emigracioni u rrit në periudhën 2010 deri në 2019 në 20 shtete anëtare dhe u ul në shtatë të tjerat.

Në vitin 2019, numri më i madh i personave që emigruan u raportuan në Gjermani (576 000 persona, 21% e të gjithë emigrantëve nga Shtetet Anëtare të BE), Francë (299.000 ose 11%), Spanjë (296.000 ose 11%) dhe Rumani (234.000 ose 9%).

Në vitin 2019, rreth gjysma e Shteteve Anëtare raportuan më shumë emigrim kombëtar sesa emigrim jokombëtar, raporton Eurostat.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.