Gazeta Si – Ulsi Manja është kundër përdorimit të gjuhës së urrejtjes dhe përçarjes sidomos për ato mbi ndarjet krahinore.
Duke mos përmendur emra, Ministri i Drejtësisë pohoi se është vetë malësor, por tha se nuk është dakord me termat fyes dhe denigrues, në lidhje me akuzat e prokurores së Tiranës Elisabeta Imeraj ndaj anëtares së KPK-së Genta Bungo, me këtë të fundit që thuhet se ka cilësuar atë si “maloke”.
“Jam krenar që jam malësor,- u shpreh Manja.- Mbështes plotësisht punën e organeve të Vettingut, por nga ana tjetër jam kundër gjuhës së urrejtjes, përçarjes, përçmimit e aq më tepër racizmit. Më vjen mirë që Shqipëria ka një kuadër rregullator të plotë në lidhje me diskriminimin, ka dhe instrumentet e duhura për zbatimin e ligjit kundër diskriminimit”.
Debati mbi ndarjet krahinore, mori rrugë në një prej seancave të Elisabeta Imerajt në Kolegjin e Posaçëm të Apelimit. Kryeprokurorja Imeraj citoi një mesazh që sipas saj, anëtarja e KPK-së, Genta Bungo e kishte cilësuar atë “maloke”, që duhej nxjerrë nga sistemi i drejtësisë.
Këtë të premte shumë qytetarë dolën një tubim para godinës së KPK-së tek Rruga e Kavajës. Veriorë e jugorë, të gjithë bashkë, e konsideruan fyerje.
Gjatë inspektimit të tij në burgun e Reçit në Malësinë e Madhe, Manja u pyet edhe për legalizimin e kanabisit, një nismë e mbështetur nga kryeministri Rama.
Manja tha se nëse i shërben ekonomisë së vendit “përse të mos legalizohet për qëllime mjekësore”. Ministri njoftoi po ashtu masat e reja në burgje, ku hiqen kufizimet për lejet, përveç lejeve shpërblyese.
Sipas tij, me familjarët do të ketë takime normale, duke e zgjeruar dhe me persona të afërm sipas përcaktimeve. Do ketë edhe takime të veçanta dhe me fëmijët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
