.png)
Gazeta Si - SPAK ka kërkuar sot sekuestrimin e pasurive të shtetasit Redjan Rraja dhe familjarëve të tij, i akuzuar për atentatin ndaj ish-prokurorit Arjan ndoj para tre vjetësh.
Në kërkesën që i ka dërguar GJKKO-së, SPAK thotë se 9 pasuritë e Redjan Rrajës duhet t’i kalojnë shtetit në pronësi.
Disa prej pronave për të cilat kërkohet konfiskimi, janë në emër të personave të tjerë, por SPAK thotë se zotërohen nga 37-vjeçari Redjan Rraja.
Sipas SPAK, pronat për të cilat kërkohet konfiskim janë: 1-Pasuria apartament, me sipërfaqe76 m2 (Tiranë), regjistruar në emër të shtetasit R. Rraja; 2-Pasuria, me sipërfaqe 30 m2, njësi (Tiranë), regjistruar në emër të shtetasit R. Rraja; 3-Pasuria njësi me sipërfaqe 127.5 m2 (Tiranë), e regjistruar në emër të shtetases M. Ç. por që është në zotërim të tërthortë nga shtetasi R. Rraja; 4-Pasuria garazh me sipërfaqetotale 18.09 m2 (Tiranë), regjistruar në emër të shtetases M. Ç. por që është në zotërim të tërthortë nga shtetasi R. Rraja; 5-Pasuria garazh me sipërfaqe totale 18.09 m2 (Tiranë), regjistruar në emër të shtetases M. Ç. por që gjendet në zotërim të tërthortë të shtetasit R. Rraja; 6-Automjeti me ngjyrë gri të tipit Audi, A8, sekuestruar shtetases K. K. por që është në zotërim të tërthortë të shtetasit R. Rraja; 7-Automjeti me targë Audi A8, regjistruar në emër të R. Rraja; 8-Një orë dore Roleks dhe 9-shuma e parave prej 2750 Euro.
Këto pasuri janë sekuestruar me vendimin nr.22 datë 23.10.2021 të Gjykatës së Posaçme e Shkallës së Parë për Korrupsionin dhe Krimin e Organizuar.
Redjan Rraja është i pandehur nga SPAK për atentatin që ndodhi më 1 Nëntor 2019 në autostradën Tiranë-Durrës, ku mbetën të plagosur prokurori i Durrësit Arjan Ndoja dhe Aleksandër Laho, ndërsa humbi jetën Andi Maloku, shoferi i prokurorit.
Në dosjen e SPAK, akuzohen Redjan Rraja dhe Ariol Halilaj për vrasje e funksionarëve publik e mbetur në tentativë, vrasje në rrethana cilësuese me pasojë vdekjen, vrasje e mbetur në tentativë, armëmbajtje pa leje, grup i strukturuar kriminal, kryerja e veprave penale nga grupi i strukturuar kriminal dhe vjedhje të kryer në bashkëpunim.
Por Redjan Rraja i ka mohuar akuzat për përfshirje në atentatin ndaj prokurorit Ndoja, duke thënë se nuk ka lidhje me këtë ngjarje.
Nëse GJKKO pranon këtë kërkesë, pasuritë e Redjan Rrajës do t’i kalojnë shtetit. Përmes një vendimi të marrë më datë 23 tetor të 2021, GJKKO vendosi të sekuestrojë një apartament në Tiranë; tre dyqane; dy garazhe; dy makina tip “Audi A8”; një makinë tip “Bentley”; një orë Rolex dhe 2 750 euro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
