“Burokracirat e shumta po pengojnë luanët të cilat shpëtuan nga “kopshti zoologjik më i keq në Europë” për t’u larguar nga Shqipëria”
Kjo fjali ka qenë edhe titulli kryesor i gazetës britanike Daily Mail, e cila pas denoncimit të rastit ku luanët dhe kafshë të tjera jetonin në kushte shumë të këqija në “Safari Park”, ka rikthyer përsëri vëmendjen tek kjo çështje.
Që prej skandalit të publikuar kafshët u zhvendosën në kopshtin zoologjik të Tiranës. Ndërkohë që për kafshët e tjera u gjetën vende strehimi, për luanët ende nuk është zgjidhur kjo çështje. Sipas gazetës luanët jetojnë ende në kushte jo të mira në kopshtin zoologjik në Tiranë. Ata janë të mbyllur në kafaze të vegjël, larg njëri-tjetrit dhe në gjendje të rënduar psikologjike.
Këtë denoncim të gazetës e mbështet edhe Ioana Dungler drejtoresha e “Four Paws” organizata ndërkombëtare e bamirësisë së kafshëve, që mori përsipër shpëtimin e kafshëve nga kopshti privat në Fier.
“Autoritetet po refuzojnë të lëshojnë dokumentet e duhura. Kjo ishte një marrëveshje e përkohshme, derisa ne të merrnim luanët në qendrën tonë. Organizata ka pasur marrëdhënie të mira me autoritetet shqiptare dhe nuk e kuptoj se çfarë po i pengon tani të kryejnë procedurat,” shtoi Dungler.
Sipas saj edhe pse kopshti zoologjik në Tiranë, është duke u përpjekur për t’u siguruar atyre kushte të mira, luanët nuk mund të rrinë në ambiente të cilat nuk janë të favorizuara për ta.
Mbas këtij denoncimi publik, ministria shqiptare e turizmit ka reaguar duke thënë për “Daily Mail” se luanët duhet të mbahen deri në shtator në Shqipëri, për shkak se pronari i tyre i parë është duke kërkuar kompensim nga gjykata për humbjen e biznesit dhe derisa çështja gjyqësore të zgjidhet, luanët nuk mund të largohen nga vendi.
Ishte pikërisht Daily Mali e cila vitin e kaluar e pagëzoi “Safari Park” me emrin “Parku i Ferrit” ku jetonin kafshë të dëmtuara, si një prej luanëve me syrin e plagosur dhe në gjendje shëndetësore të dobët dhe kafshët e tjera që mbaheshin në kushte robërie brenda kafazeve pa ushqim dhe kujdes shëndetësor.
Aso kohe imazhet ishin dërguar në redaksinë e “Daily Mail” nga një fotograf anonim, i cili ishte i vendosur për të treguar kushtet në kopshtin zoologjik. Pasi u shfaqën fotografitë që treguan kushtet tronditëse të “Safari Park” mediat ndërkombëtare u shtangën nga gjendja që ishin kafshët. Në të gjithë fotografitë tregohej se, kafshët lëngonin në kafaze të shkreta, të pista dhe të rrethuara nga jashtëqitjet e tyre dhe pa asnjë depozitë uji përreth, që mund të shërbente për pastrim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.