Adriatik Llalla i është drejtuar Gjykatës së Apelit me tre kërkesa, mes të cilave edhe ajo për pezullim të ekzekutimit të vendimit me burg për arsye shëndetësore.
Vetë ish-kryeprokurori i dënuar me dy vite burg nuk ishte i pranishëm në seancë, por përmes avokatit të tij shtroi kërkesën për pafajësi, kthim të çështjes për rigjykim në shkallën e parë, ose në rast fajësie pezullim të dënimit me burg.
Kërkesa për pezullim të dënimit u mbështet te një akt-ekspertimi që avokati i paraqiti gjykatës në të cilin thuhej se Adriatik Llalla ishte i sëmurë dhe në regjim spitalor.
Llalla u dënua me dy vite burg më 20 maj nga shkalla e parë e Gykatës së Posaçme. Veç burgut, ai ndalohet edhe që të kryejë funksione publike për pesë vite.
Ish-kryeprokurori u dënua për “fshehje dhe mosdeklarim të pasurisë”.
Veç këtyre, Llallës iu vendos konfiskimi i 22 mijë metrave/katrorë truall dhe një apartamenti në Durrës. Prej shkurtit 2018, Llalla është pjesë e listës së zezë të Departamentit Amerikan të Shtetit, që i ka ndaluar hyrjen në SHBA atij dhe familjarëve.
Sipas mbrojtjes, çështja ndaj Llallës është e paragjykuar, e njëanshme, e padrejtë, e paligjshme dhe e stisur.
Në lidhje me këtë çështje, pritej një vendim përfundimtar këtë të enjte nga Gjykata e Apelit, por vendimi u shty për në datën 22 shtator.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
