.png)
Gazeta Si – Bandat shqiptare, akuzohen nga policia se mbizotërojnë tregun e drogës në Mbretërinë e Bashkuar, duke marrë kontrollin falë çmimeve të ulëta dhe duke nxjerrë jashtë loje kundërshtarët e tyre.
Duke mos përmenduar dhunën vdekjeprurëse, anëtarët e bandave shqiptare, thuhet se kanë përdorur lidhje direkte me kartelet kolumbiane për të siguruar kokainën me vlerën më të mirë, duke i lejuar ata të bashkëpunojnë me grupet kriminale britanike, me premtimin e fitimeve të mëdha.
Por, ndërsa ky model ka bërë që një brez i ri kriminelësh të marrë nën kontroll grupet e krimit të organizuar në qytete të mëdha të Anglisë, si Londra dhe Birmingami, kjo nuk nuk ndodh në qytete të tjera.
Sipas gazetës prestigjioze britanike, “Daily Mail”, Liverpuli duket si një nga zonat e pakta, ku shqiptarët nuk mund të operojnë, thonë ekspertët, pasi tregtia e drogës mbetet në duart e kriminelëve lokalë, shpesh me lidhje të forta me komunitetet që bashkëpunojnë.
Kjo u tregua nga dënimi i fundit i një çifti të ri nga Liverpuli, Eddie Burton, 23 vjeç, dhe Sian Banks, 25 vjeçe, për drejtimin e një trafiku droge prej 20 milionë paundësh, i cili solli qindra kilogramë heroinë, kokainë dhe ketaminë të fshehura në kamionë nga Evropa në Mbretërinë e Bashkuar.
Çifti do të dalë në gjyq javën e ardhshme, pasi rrjeti i tyre u shkatërrua nga oficerët e Agjencisë Kombëtare të Krimit, pas arrestimit të Burton nga policia spanjolle në klubin “Pacha” në Ibiza në gusht të vitit 2023.
Një bandë tjetër, me bazë në Wirral, u dënua me një total prej 44 vitesh burg në fund të janarit për përdorimin e shërbimit postar të “Royal Mail” për të dërguar 2.7 milionë paundë ekstazi, kokainë, kërpudha haluçinogjene, LSD dhe ketaminë në të gjithë vendin.
Grupi i ruante drogat e forta në një depo në Birkenhead, përpara se të dërgonin porositë nga një zyrë postare brenda një dyqani lagjeje.
Jashtë Merseyside, dominimi në rritje i bandave shqiptare është identifikuar në një sërë studimesh zyrtare, përfshirë një raport të OKB-së të vitit 2023, i cili zbuloi se bandat nga vendi ballkanik, tani “ushqejnë një kontroll të konsiderueshëm” mbi tregun e drogës në Mbretërinë e Bashkuar.
Vitin e kaluar, një dokument i brendshëm ligjor i Ministrisë së Brendshme britanike, përshkruante bandat kriminale shqiptare si kërcënim për Mbretërinë e Bashkuar dhe “shumë të përhapura në krimin e rëndë dhe të organizuar” në Britani, përfshirë dhe disa vrasje.
Mendohet se kjo përfshin vrasjen e Rhys Thompson, 29 vjeç, një baba i ri që u rrëmbye dhe u rrah për vdekje në një konflikt të lidhur me një përpjekje të dështuar për të “taksuar” një fermë kanabisi që besohet të jetë drejtuar nga një bandë shqiptare.
Ai u gjet i vdekur me shirit ngjitës të mbështjellë rreth qafës në West Yorkshire, në mëngjesin e 13 majit 2021. Askush nuk është akuzuar ndonjëherë për vrasjen e tij.
Kërkimet e Agjencisë Kombëtare të Krimit kanë treguar se grupet e krimit të organizuar shqiptar, kontrollojnë tregun e kokainës në qytetet kryesore dhe zonat periferike të Mbretërisë së Bashkuar (me përjashtim të Merseyside).
Por, NCA thotë se këta gangsterë po specializohen gjithnjë e më shumë në kanabis, i cili konsiderohet si një treg “me rrezik shumë të ulët”.
Në vitin 2023, agjencia dhe 43 forca policore në Angli dhe Uells, synuan bandat e Ballkanit Perëndimor, duke sekuestruar gati 200.000 bimë kanabisi me vlerë deri në 130 milionë paund, 636,000 paund në para cash, 26 kilogramë kokainë me vlerë deri në 1 milion paund dhe 20 armë zjarri.
Por, me bosët e krimit shqiptar që po forcojnë gjithnjë e më shumë kontrollin e tyre në pjesën më të madhe të Mbretërisë së Bashkuar, pse nuk kanë mundur të vendosin praninë e tyre në qytetin e Liverpulit?
Ekspertët përmendin disa arsye, përfshirë kontrollin e fortë tradicional nga gangsterët vendas, si Curtis Ëarren dhe grupi Huyton mbi dërgesat ilegale që kalojnë përmes portit të qytetit.
Peter Walsh, autor i librit “Drug War: The Secret History”, beson se një përgjigje tjetër mund të gjendet duke parë sesi bandat ballkanike u infiltruan për herë të parë botën e krimit në Britani. “Shqiptarët u bënë një forcë në Evropë gjatë viteve 1990, tha ai për “MailOnline”.
“Ata krijuan lidhje me kolumbianët që eksportonin kokainë në Evropë përmes rrugëve të mëdha detare. Duke negociuar drejtpërdrejt me furnizuesit, shqiptarët mundën të anashkalonin bandat më të konsoliduara në Evropë. Por, më e rëndësishmja, ishte se ata i shisnin drogat me çmime më të ulëta sesa grupet ekzistuese të krimit, gjë që u dha një avantazh kyç. Shqiptarët lulëzuan në Londrën e Madhe, e cila ishte tashmë e larmishme nga ana racore. Pastaj u zgjeruan në rrethinat e Londrës dhe drejt Birminghamit, – vazhdon ai. – Mendoj se Merseyside ka mbetur jashtë ndikimit të tyre për një kombinim faktorësh që kanë punuar kundër tyre. E para, është se Liverpuli është një qytet me lidhje shumë të forta lokale dhe klanore. Furnizimi me drogë në Liverpul ka qenë gjithmonë i dominuar nga grupe krimi të mirëvendosura, të cilat kanë lidhje të forta brenda komuniteteve”.
Pavarësisht reputacionit të tyre për hakmarrje të egra kundër rivalëve kriminalë, Walsh mendon se modeli i biznesit të shqiptarëve bazohej te konkurrenca në çmime dhe jo te dhuna tipike e bandave të drogës.
“Mendimi që shqiptarët të përpiqeshin të konkurronin me çmime më të ulëta kundër bandave lokale të Liverpulit nëpër klube nate apo lagje të varfra, është qesharak. Pika e parë është se ata nuk do të kishin mundur të përziheshin me komunitetin në të njëjtën mënyrë siç mundën ta bënin në Londër dhe Birmingam. Anëtarët e komuniteteve lokale të lidhur me bandat e drogës i kanë raportuar aktivitetet e tyre te policia dhe më pas ata janë përballur me dhunë të rëndë. Liverpuli është një qytet ku grupet e jashtme të krimit hezitojnë të hyjnë nga frika e dhunës“, shton ai.
Një ish-detektiv që ka shërbyer për dekada në Scotland Yard i tha “MailOnline” se bandat shqiptare të drogës u shfaqën si një problem në fillim të viteve 2000.
Një ish-detektiv, i cili kërkoi të mbetej anonim, tha se “FBI (amerikane) erdhi në Scotland Yard për të na paralajmëruar për kërcënimin e veçantë që grupet kriminale shqiptare paraqisnin për Mbretërinë e Bashkuar”.
“Zyrtarët amerikanë na thanë se shqiptarët ishin të gatshëm të përdornin një nivel të egër dhune që nuk ishte parë më parë në Britani. Më pas, patëm takime me zyrtarë të MI6 (shërbimi sekret britanik) për të diskutuar këtë kërcënim. Ishte e qartë që atëherë, se shqiptarët ishin të aftë në trafikun e qenieve njerëzore, të drogës dhe armëve të zjarrit“, thekson ai.
Ish-detektivi pretendoi se shumë gangsterë shqiptarë hynë në Mbretërinë e Bashkuar duke pretenduar se kërkonin azil nga lufta e Jugosllavisë, përpara se të krijonin një bazë të fuqishme në lagjen “Hounslow” të Londrës Perëndimore, pranë aeroportit Heathrow.
“Shqiptarët hynin në Britani për të kryer vrasje hakmarrëse – një shqiptar që punonte si taksist në zonën e Hove u ther për vdekje nga një prej këtyre skuadrave të vrasësve. Vrasësit më pas u përpoqën të largoheshin nga Britania, por ekipi im arriti t’i kapte në kohë. Do t’i përshkruaja grupet kriminale shqiptare me të cilat kemi pasur të bëjmë, si veçanërisht mizore dhe të pamëshirshme“, analizon ai.
Pavarësisht se nuk kanë arritur të depërtojnë në Liverpul, ai tha se bandat shqiptare tani kanë shtrirë ndikimin e tyre edhe në vende të tjera, deri në Australi.
Një burrë nga Liverpuli me njohuri mbi botën e krimit të qytetit, përmendi disa faktorë të tjerë që e bëjnë skenën e drogës në qytet veçanërisht të vështirë për të huajt.
Ai tregoi për “MailOnline”: “Industria e sigurisë në klubet e natës në Liverpul dikur ishte e lidhur ngushtë me tregtinë e drogës. Ekipet e sigurisë kontrollonin shitjen e drogës në klube dhe bare, për ta thënë thjesht. Por rojet e klubeve ishin të gjithë vendas dhe i njihnin pronarët e klubeve. Po, kishte ndonjëherë konflikte, por në fund gjithçka rregullohej. Pika e dytë, është porti i Liverpulit. Curtis Warren dhe më pas grupi Huyton gjithmonë kanë kontrolluar atë që hyn përmes portit. Përsëri, shqiptarët nuk kanë asnjë ndikim këtu, kështu që nuk mund të depërtojnë në treg. E vetmja mundësi për shqiptarët në Liverpul është që një grup i vogël të vijë për fundjavë, të shesë pilula droge në disa klube dhe më pas të largohet të hënën”.
Përshtati në shqip: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
