Fushata e vaksinimit ka hyrë në ditën e dytë të saj, ku kategoria që përfiton janë grupet e epidemiologëve në qarqet Tiranë dhe Durrës, dy prej zonave më të prekura nga pandemia.
Kryeministri Edi Rama ndoqi nga afër procesin. Ai thotë se përmes vaksinimit të personelit që shkon dhe kryen testimet nëpër banesat e qytetarëve hidhet një hap i madh përpara në luftën kundër përhapjes së infeksionit.
Rama shoqërohej nga ministrja e Shëndetësisë, Ogerta Manastirliu. Ajo bëri një bilanc të ditës së parë të vaksinimit.
“Dita e djeshme ka vajtur mirë. Kemi vaksinuar rreth 50 mjekë dhe infermierë”, u shpreh Manastirliu.
Nga Ministria e Shëndetësisë thonë se kapacitetet vaksinuese të vendit tonë mund të shkojnë deri në 600 veta në ditë. Pas mjekëve dhe infermierëve, vaksinimi do të vijojë me shtëpitë e të moshuarve, sipas protokolleve të përcaktuara.
Shefja e Epidemiologjisë në ISHP, Silva Bino dha lajmin e mirë se vaksinimi për të moshuarit do nisë menjëherë krahas mjekeve e infermierëve.
Bino i shpjegoi gjithashtu kryeministrit Rama se në ditën e parë të vaksinimit nuk ka pasur asnjë humbje flakoni.
“Dje s’kemi humbur asnjë humbje flakoni, në kuptimin e dozave, s’kemi asnjë dozë të humbur. Sepse cdo flakon duhet të bëhet sipas kohës së saktë, pra kur e hapim flakonin duhet të përdoret brenda 2 orësh, e në frigorifer duhet të rrijë e të përdoret brenda 6 orësh. E kemi organizuar në mënyrë që mos humbim asnjë dozë qe gjithe secili te vaksinohet ne kohen e duhur”. Këtu ne mund të vaksinojmë 600 veta brenda ditës”, tha Bino.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.