.png)
Shfryhet vrasja e Hekuran Billës, ngjarje e ndodhur në 11 qershor 2020 në zonën e “Komunës së Parisit” në Tiranë. Gjykata Penale e Tiranës ka vendosur të ndryshojë masën e sigurisë, nga “arrest me burg”, në “arrest shtëpie” për Viktor Markun dhe Sebastian Malin. Dajë dhe nip, janë personat e arrestuar dhe të akuzuar për vrasjen e Billës, për arsye hakmarrjeje.
Nga na tjetër, mësohet se prokuroria ka kërkuar pushimin e çështjes, pasi sipas akuzës nuk ka prova që vërtetojnë krimin. Kjo kërkesë mësohet se nuk është shqyrtuar ende nga gjykata.
Në këtë mënyrë, duke qenë se ka mbaruar edhe afati i paraburgimit të dhënë më parë dhe në pamundësi nga prokuroria për të çuar prova të reja për zgjatjen e tij, gjykata është detyruar që të lirojë Markun dhe Malin nga qelia duke i lënë në “arrest shtëpie”.
Ashtu si dy të rinjtë, në qershor të këtij viti doli nga qelia edhe Adiola Lakra, e dashura e Billës, e cila dyshohet se e nxori në pritë në zonën e “Komunës së Parisit”. Me vendimin e fundit, kjo dojse hetimore do të pezullohej për shkak të mungesës së autorit të krimit.
Viktima, Hekuran Billa, kishte vetëm pak kohë që ishte liruar me kusht nga burgu i Fushë-Krujës, pas një vendimi të dhënë nga gjyqtarja Enkelejda Hoxha, tashmë e arrestuar për korrupsion nga SPAK.
Vrasja e tij ndodhi përmes një skenari mafioz, ku Billa është qëlluar me breshëri nga një distancë shumë e afërt, ku mbeti i vdekur në vend në makinën e tij fuoristradë “Benz”.
Sipas organit të akuzës, ai u ekzekutua për shkak të hakmarrjes, pasi Billa në vitin 2006 në Britani, ka vrarë vëllain e Viktor Markut, Prel Markun.
Billa e qëlloi Prel Markun, 22 vjeç, në kokë në një klub nate në “Park Royal” të Londrës më 14 tetor 2006. Ai u shpall fajtor për tre akuza dhe u dënua me burgim të përjetshëm, me një mandat minimal të rekomanduar për 34 vjet.
Ky vendim u njoh nga gjykatat Shqiptare, të cilat vendosën ta dënojnë Billën të deportuar në Shqipëri me 25 vite burgim.
Një pjesë të dënimit, Billa e vuajti në burgun e Fushë-Krujës, ku më pas mundi të përfitojë lirinë me kusht pas një vendimi të firmosur nga gjyqtarja Enkelejda Hoxha. Pas daljes nga burgu, 40-vjeçari lëvizte lirshëm, çka solli dhe nisjen e planeve të kundërshtarëve të tij për ta ekzekutuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
