.png)
Gazeta Si - Emri i Suel Çelës ishte i panjohur në kronikat e lajmeve të aktualitetit deri në përplasjen mes tij dhe drejtorit të Policisë së Elbasanit në vitin 2017 në hyrje të tregut agro-ushqimor. Çela me “Audi”-n e tij luksoz, për pak sa nuk shtypi policët që e ndaluan për kontroll.
Pamjet e publikuara, treguan mjetin duke hyrë në mjediset e brendshme të tregut të fruta-perimeve, ku roja mbyll menjëherë derën duke mos lejuar policinë që ta ndjekë nga pas.
Për policinë dhe organet ligjzbatuese, ai ishte pjesë e një kontigjenti me akuza e vepra të rënda penale mbi shpinë.
Ai rezulton i dënuar në Itali për trafik droge, por megjithëse i tillë u është shmangur disa herë përpjekjeve për ta arrestuar dhe ekstraduar.
Kush është Suel Çela
Suel Çela, i njohur edhe si Marjus Lulaj nga Elbasani, u shpall në kërkim në maj të 2022 në kuadër të dosjen ‘Plumbi i Artë’.
Sipas dëshmisë së Nuredin Dumanit ai është porositës i tre ngjarjeve 2 të parealizuara dhe 1 e mbetur në tentativë.
Suel Çela akuzohet se ka porositur atentatin e dështuar të 29 marsit 2022 ndaj Elton Kilës, që do ta kryente bashkëpunëtori i drejtësisë, Nuredin Dumani, por i cili mbeti i plagosur rrugës dhe më pas u arrestua.
Një tjetër krim i porositur nga Suel Çela, është ajo e tentativës për të vrarë administratorin e shkollës private Lulzim Masha, ku Skerdi Tase, dyshohej si vrasës me pagesë në këtë rast. Suel Çela, rezulton i dënuar në Itali për trafikim narkotikësh, por ai ka arritur t’i shpëtojë burgut.
Ngjarja e 2017-s
Përplasja në Tregun Agro-Ushqimor ndodhi në 18 shtator 2017 në Elbasan. Në atë kohë policia e Elbasanit kishte informacion për një grup të rrezikshëm që po lëvizte në qytet prandaj organizoi kontrolle.
Pikërisht para tregut Agro-Ushqimor Policia ndaloi një Range-Rover ku brenda tij ishin Enea Bekteshi e Kelmend Xhaferri. Uniformat blu të Elbasanit i arrestuan dy të rinjtë për shkak se kundërshtuan punonjësit.
Mirëpo, në momentin që policët po largoheshin, një Audi i blinduar vjen drejt makinave të policisë dhe në këtë moment përplasen me njëra-tjetrën. Sipas Prokurorisë, policia ishte në aksion dhe “Audi” ka goditur me qëllim makinën e Gjergji Oshafit.
Në dosje theksohet se “Audi”-n e blinduar e drejtonte Suel Çela, i cili më pas u fut brenda Tregu Agro-Ushqimor.
Dera e tregu u mbyll dhe policia nuk mund të hynte dot në brendësi, për shkak se roja nuk e hapi portën. Kur policia u fut brenda tregut, sipas Prokurorisë, Suel Çela ishte larguar.
Në nëntor 2019, Gjykata e Elbasanit vendosi ta shpallë të pafajshëm Celën për sulmin ndaj policisë.
Edhe pse prokuroria kërkoi 7 vite burg, gjykata vendosi ta shpallë të pafajshëm Çelën për mungesë provash, ndërsa dënoi shokun e tij si autor të ngjarjes.
Porositë për eliminim të rivalëve
Tentativa për eliminimin e kundërshtarëve të tyre, ka qenë pjesë e qëllimit të grupit kriminal të drejtuar nga Suel Çela në Elbasan.
Organizata e tij, dyshohet se qëndron edhe pas atentatit me snajper që la të plagosur Ardian Çapjen në Elbasan dhe atij vdekjeprurës ndaj krahut të djathtë të tij, Bledar Muça në Anversë, i cilësuar edhe si killeri i familjes Çapja.
Ky i fundit i ka shpëtuar disa atentateve, mes tyre edhe me antitank. Një prej sulmeve, ishte plagosja me një armë snajper nga distanca, në oborrin e vilës së tij, në periferi të qytetit.
Krimi ndodhi më 8 ershor të vitit 2020 dhe ky ishte atentati i tretë që i mbijetonte. 55-vjeçari u qëllua me armë zjarri, snajper ushtarak në një atentat të mirë organizuar, pranë shtëpisë, ngjitur me hotel 'Univers'-in në pronësi të tij, në hyrje të qytetit të Elbasanit, zona e Krastës.
Për këtë ngjarje SPAK akuzon kreun e grupit rival, Suel Çela, që gjithashtu bashkëpunonte me grupin tjetër Çopja.
Vrasja e Bledar Muçës në Belgjikë
Po ashtu, SPAK akuzon organizatën kriminale të Suel Çelës se fshihet pas vrasjes së Bledar Muçës ndodhur në janar të 2022 në Belgjikë.
Në njoftimin e SPAK thuhet se ky grup, "Siguroi kushtet dhe mjetet materiale për të kryer vrasje në dëm të E. K. dhe Bledar Muça.
Vrasja e tij u bë në Belgjikë më 22 janar të vitit 2022, teksa edhe më parë i kishte shpëtuar dy atentateve të tjera, njëri prej të cilëve në Elbasan.
Muça cilësohej si njeriu më i afërt i numrit dy të organizatës, Florenc Çapja, që fshihet në Dubai. Për këtë vrasje, SPAKa ka lëshuar urdhërarrest 'arrest me burg' edhe për Sergei Hasanpapaj, i arrestuar në Belgjikë.
Po për të njëjtën ngjarje, në tetor të këtij viti u arrestua Marsel D. 43-vjeçari u arrestua në aeroportin e Valencias në Spanjë.
Mediat belge ishin ato që zbuluan se bëhet fjalë për shqiptarin Marsel D., i kërkuar për vrasje në Belgjikë, më 22 janar 2022 në Aartselaar. Ai ndihmoi ekzekutorët duke u treguar lëvizjet e Muçës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
