.png)
Në “luftën” e rrugëtimit politik se kush ka denoncuar i pari për të valvitur flamurin e një çështje që nuk dihet se si do të përfundojë, ajo e inceneratorëve, secila prej palëve kundërshtare brenda PD por edhe jashtë saj po bëjnë një garë të ethshme.
Në fund të fundit, arrestimi i ish-Ministrit të Mjedisit, Lefter Koka, mund të konsiderohet si fitorja e parë politike e opozitës në raport me drejtësinë e “re” në gjithë denoncimet e saj disa vjeçare për një çështje që ngulit te të gjithë, inceneratorët.
Qysh prej arrestimit të Kokës (të martën 14 dhjetor), Lulzim Basha ka dalë tre herë për mediat, përfshi edhe një konference për shtyp, për të treguar se kjo thellë thellë është një fitore e PD-së.
Edhe të enjten në mesditë, Basha komentoi në Facebook për të njëjtën çështje duke hedhur një video kur denoncimi i tij datonte që në nëntor 2017.
“Për vite me radhë Partia Demokratike ka denoncuar aferën mafioze të inceneratorëve, ndërsa zbatuesit e kësaj skeme e mbrojtën me çdo mjet e formë plaçkën 430 milionë euroshe me taksat e qytetarëve shqiptarë. Koha na dha të drejtë”, shkruan Basha në Facebook.
Paralelisht edhe kryetarja e LSI-së, Monika Kryemadhi është "zgjuar” me reagime duke mbushur faqen e saj në Facebook me reagime ndaj arrestimit te Lefter Kokës, duke botuar kopje të kallëzimeve penale që LSI-ja ka depozituar gjatë vitit, si dhe duke njoftuar së fundmi se ajo kishte depozituar materiale shtesë në SPAK jo vetëm për inceneratorin e Elbasanit (për të cilën rëndon edhe akuza për Lefter Kokën) por edhe për atë të Tiranës dhe Fierit.
Nuk ka qëndruar duarkryq as ish-kryeministri Sali Berisha.
Ai është shprehur me bollëk se ka qenë ndër të parët që ka denoncuar aferën e inceneratorëve shoqëruar me një postim të gjatë në Facebook, ku ndër radhë Berisha nënvizonte se denoncimi nga PD-ja kish ardhur që në vitin 2015 nga Departamenti i Mjedisit dhe Antikorrupsionit të PD (atëherë i drejtuar nga Jamarbër Malltezi).
“Departamenti i Mjedisit në PD kish shumë vite që e ka denoncuar këtë aferë. Me iniciativën e tij bëri gati paditë penale qysh para dy vitesh për të depozituar në SPAK, por ish kryetari e pengoi përmbi 1 vit këtë denoncim për arsye që nuk i shpjegoi ndonjëherë. Në shtator 2020 u lejua Departamenti që të depozitonte 3 padi penale, ndërsa 3 paditë e inceneratorëve ish kryetari i kërkoi që të mos i depozitonte Departamenti i Mjedisit por si PD”, shkruante ndër radhe Berisha
Ish-kryeministri përfshiu (sërish me dashje politike) edhe LSI kur kujtonte gjithashtu ndër radhë se, ”në fillim të 2021 kryetarja e LSI gjeti lidhjen direkte, se për inceneratorin e Elbasanit, ish ministri Lefter Koka kish krijuar 8 kompani fiktive”
Edhe në Kuvend të enjten nënkryetarja e PD-së, Jorida Tabaku foli gjatë për inceneratorët dhe angazhimin e kësaj partie në denoncimin e këtij procesi.
“Kur katër vite më parë nga kjo foltore ftova në interpelancë ish ministrin e Infrastrukturës dhe Energjitikës, z. Damian Gjiknuri, pakkush e besonte se afera e inceneratorëve do mbante kaq erë...”, e filloi fjalimin në Kuvend, Jorida Tabaku.
Që do të thotë se të paktën deri të shtunën (kur do të vendoset shumëçka për të ardhmen e PD-së) ky debat që po ecën paralelisht edhe me seancën për masën e sigurisë ndaj Lefter Kokës do të vijojë të jetë në qendër të vëmendjes.
Kësaj here jo më shumë për fatin e Lefter Kokës, por për “fatin” e demokratëve dhe vetë opozitës ku secili prej protagonistëve kush me shumë e askush më pak po përpiqet ta “përvetësojë” si fitore personale ku në fakt nuk duhet parë asfare si e tillë. / N.P
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
