Tre efektivë të Policisë së Kosovës të plagosur dhe mbi 20 persona të arrestuar është bilanci i deritanishëm i operacionit të beftë të ndërmarrë nga ana e autoriteteve të Prishtinës në Mitrovicën Veriore në orët e para të ditës së martë.
Prokurori Syle Hoxha konfirmoi se mes të arrestuarve është edhe shefi i policisë të komunës së Zubin Potokut, ndërkohë që gjendja e tre efektivëve të Policisë së Kosovës është jashtë rrezikut për jetën. Dy prej tyre janë plagosur në gjymtyrë dhe kanë marrë ndihmën e parë mjekësore në qendrat spitalore të zonës, ndërsa një tjetër u transportua për në Spitalin e Mitrovicës.
Mes të arrestuarve, veç shefit të policisë së Zubin Potokut me etni serbe, ka edhe zyrtarë doganorë dhe shtetas të tjerë shqiptarë, serbë e boshnjakë të dyshuar për aktivitete kriminale. Nën pranga ka përfunduar edhe një shtetas rus. Ky i fundit ka qenë mes banorëve që janë përpjekur të pengojnë operacionin e Policisë së Kosovës, duke paraqitur një dokumentacion si punonjës i UNMIK-ut. Ai u arrestua nga policia e Kosovës dhe më vonë u identifikua si Mihal Krasnoshchenkov. Presidenti Thaçi e konfirmoi këtë.
Operacioni vuri në alarm banorët serbë edhe në qytetin e Mitrovicës. Sirenat e alarmit ranë herët në mëngjes dhe një grup banorësh u mblodhën në qendër të qytetit. Megjithatë, përveç përplasjeve me armë zjarri në fshatrat ku u ndërmor operacioni i Policisë së Kosovës, e ku u plagosën tre efektivët, nuk ka patur incidente të tjera.
Udhëheqësit e Kosovës thanë njëri pas tjetrit se përveç goditjes së krimit të organizuar, kontrabandës dhe aktiviteteve të tjera të jashtëligjshme, operacioni i policisë nuk kishte asnjë qëllim tjetër.
“Ftoj të gjithë qytetarët e Kosovës, pa dallim etnie që ta shohin këtë çështje si një ndërmarrje krejt normale për vendosjen e rendit dhe ligjit. Nuk është e drejtuar kundër asnjë komuniteti, përkundrazi duhet t’u jemi mirënjohës qytetarëve për bashkëpunimin që kanë bërë me institucionet dhe policinë e Kosovës”, deklaroi Presidenti Hashim Thaçi.
“Me urdhër të Prokurorit, në gjithë Kosovën aktualisht është duke ndodhur një operacion policorë, i drejtuar ndaj individëve të përfshirë në kontrabandë, krim të organizuar dhe vepra të tjera kriminale. Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Operacioni u zhvillua me sukses edhe në Komunat Veriore të Kosovës. Si Kryeministër i vendit, konfirmoj se bëhet fjalë për zbatimin të ligjit dhe asgjë tjetër”, komentonte nga ana tjetër përmes një postimi në rrjetet sociale, Kryeministri Ramush Haradinaj.
Kreu i Kuvendit, Kadri Veseli e përcolli idenë e tij nga fshati Çabër, fshat i banur me shqiptarë pranë Zubin Potokut. “Ne do t’ia dalim të ndërtojme një shtet liberal-demokratik të së drejtës e sundimit të ligjit. Do të ndërtojmë një shtet ku të gjithë qytetarët të bëjnë jetën e tyre të qetë dhe të sigurt në vendin e tyre”, thotë Veseli.
Kreu i Kuvendit më herët kishte takuar efektivët e policisë të mbetur të plagosur gjatë aksionit. “As uniforma dhe as posti zyrtar nuk ka për të mbrojtur asnjë kriminel nga forca e ligjjt. Të gjithë të barabartë para ligjit!”, deklaronte ai.
Edhe zëdhënësi i KFOR-it, Vincenzo Graso tha se Policia e Kosovës ka ndërmarrë një operacion në gjithë Kosovën dhe ai nuk është një operacion kundër serbëve. “KFOR-i po e vëzhgon situatën. Operacioni i Policisë së Kosovës po ndodh me urdhër të Prokurorit të Kosovës dhe nuk po ndodh vetëm në veri si dhe nuk është i drejtuar vetëm kundër serbëve, por ndaj të gjithë atyre që janë të përfshirë në krim dhe korrupsion”, ka thënë ai. Sipas tij, “ky është një aksion normal i Policisë së Kosovës dhe KFOR vetëm do ta monitorojë situatën”.
Deklaratën e KFOR-it e konfirmojnë edhe autoritetet e Kosovës. Policia e Prizrenit ka vënë në pranga tetë persona. Katër prej tyre janë zyrtarë të pikës doganore të Vërmicës, ndërsa katër të tjerë janë qytetarë, dy me shtetësi të Kosovës dhe dy me shtetësi të Shqipërisë.
Pavarësisht zotimit të udhëheqësve të Kosovës dhe të KFOR-it, në Beograd është reaguar me zemëratë ndaj ndërhyrjes së Policisë së Kosovës në pjesën veriore të shtetit. Presidenti serb, Aleksandër Vuçiç thirri një mbledhje urgjente të Këshillit të Sigurisë dhe u bëri thirrje vendeve Perëndimore që të “ndalnin Prishtinën”. “Serbia nuk do të qëndrojë duarkryq të vëzhgojë kur Kosova ndërmerr një spastrim etnik”, citohet ai nga mediat serbe.
Vuçiç tha se kishte njoftuar Moskën për arrestimin e shtetasit rus në veri të Mitrovicës, ndërkohë që më herët deklaroi se çdo ndihmë nga aleatët besnikë të Serbisë, si Rusia dhe Kina ishte e vyer dhe e mirëpritur.
Presidenti serb foli për një operacion të paralajmëruar spastrimi etnik, ndërsa mediat në Beograd raportuan se Vuçiç kishte udhëzuar Ministrinë e Brendshme dhe atë të Mbrojtjes që të kalonin forcat speciale të policisë dhe ushtrinë në gjendje gatishmërie të lartë.
Kreu i zyrës së qeverisë serbe për Kosovën, Marko Gjuriç deklaroi se qëllimi ishte të shkaktonte frikë dhe panik.
“Sot në mëngjes, rreth orës 06:00, njësitë speciale të ROSU-së sulmuan nga tre drejtime në veri të Kosovës, në territorin e të katër komunave me shumicë serbe, me qëllim të shkaktonin frikë dhe panik” tha Djuriç për agjencinë e lajmeve Tanjug. Ai foli për “metoda të tmerrshme të separatistëve nga Prishtina për të trembur serbët”. “Ata duan të krijojnë një klimë për t’ua bërë të pamundur jetesën serbëve në Kosovë”, vijoi ai.
Rusia reagoi përmes zëdhënëses të Ministrisë së Jashtme. Në deklaratë, Ministria e Jashtme ruse e cilëson operacionin e autoriteteve të Kosovës provokimin e radhës të nxitur nga heshtja e Perëndimit. “MPJ e Rusisë u bënë thirrjeve udhëheqësve ndërkombëtare në Prishtinë, që të parandalojnë përshkallëzimin e mëtejshëm të konfliktit”, thuhet në deklaaratë.
Rusia thotë se ndërhyrje të tilla përshkallëzojnë tensionet ndëretnike dhe minojnë përpjekjet shumëvjeçare për një zgjidhje paqësore të konfliktit.
Përplasjet më të mëdha kanë ndodhur në Zubin Potok, ku banorët serbë kanë ngritur barrikada me goma në rrugë, të cilave u kanë vendosur flakën për të penguar autokolonën me mjetet e policisë, mes të cilave edhe autoblindat e forcave speciale ROSU.
Rreth 200 efektivë policie janë përfshirë në këtë aksion madhor, për të cilin fillimisht u hamendësua nga mediat kosovare se aksioni shënjestronte grupet kriminale që dyshohet se qëndrojnë pas vrasjes së ish-udhëheqësit të serbëve të Kosovës, Oliver Ivanoviç dhe të efektivit të ROSU-t, Enver Zymberi në ngjarjen e ndodhur në 2011.
Por, autoritetet e Kosovës i hodhën poshtë këto hamendësime. Fillimisht Kryeministri Haradinaj dhe më pas zyrtarë të tjerë të qeverisë, parlamentit dhe të institucioneve të drejtësisë thanë se aksioni në veri ishte pjesë e një operacioni më të gjerë të ndërmarrë edhe në zona të tjera të vendit për të goditur paligjshmërinë dhe krimin e organizuar.
Kontrolle të ngjashme u raportuan në Drenicë e Prizren. Zyrtarët akuzohen për shpërdorim detyre dhe korrupsion, ndërsa shtetasit e ndaluar për kontrabandë dhe shmangie të tarifave doganore. Edhe në zona të tjera ku nuk ka minoritet serb pati kontrolle të ngjashme, por vëmendje dhe rezistencë hasi vetëm aksioni në Mitrovicën Veriore. Policia e Kosovës tha se edhe pse u përball me rezistencë, operacioni pasoi me arrestime dhe kontrolle të imtësishme, gjatë të cilave janë sekuestruar armë zjarri dhe prova të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.