.png)
Për disa ditë me radhë, Kombëtarja Shqiptare e Basketbollit për meshkuj nuk është lejuar të stërvitet në sallën e lojërave me dorë të Parkut Olimpik, “Feti Borova”. Pavarësisht se kush është fajtori, është e turpshme që lojtarët e një ekipi kombëtar të bredhin sa andej-këndej me çanta në krah, pasi nuk u hapet dera sallës së stërvitjes.
Një kontratë e munguar mes Federatës Shqiptare të Basketbollit dhe Bashkisë së Tiranës, që ka në administrimin Parkun Olimpik, nuk lejon që basketbollistët e kombëtares të stërviten sipas programit të tyre, në kryeqytet. Ata janë detyruar këto ditë të shkojnë në Durrës për t’u stërvitur, duke krijuar një situatë absurde. Gazeta Si mëson se nga bashkia kërkohet që të ketë një kontratë mes palëve, natyrisht kundrejt një pagese, ndërsa Federata e Basketbollit gjykon se nuk ka pse të firmoset kontratë, kur bëhet fjalë për stërvitjen e ekipit kombëtar.
Nesër luhet ndeshja me Danimarkën, e programuar për në sallën e Parkut Olimpik, por duke gjykuar nga situata aktuale, nuk është çudi që kjo ndeshje të spostohet në Durrës, nëse pranon ekipi kundërshtar. Në të kundërt, kombëtarja jonë mund ta humbë ndeshjen në tavolinë.
Alarmin për këtë situatë të pakëndshme e ka ngritur sekretari i Federatës së Basketbollit, Korab Llazani. Përmes një video, Llazani ka treguar se ekipi kombëtar për ditën e katërt rresht nuk është lejuar të futet në ambientet e “Tirana Olimpik Park” për tu stërvitur në sallën sportive Feti Borova.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
