.png)
Kolumbia ka dekriminalizuar abortin gjatë 24 javëve të para të shtatzënisë.
Gjykata Kushtetuese e Kolumbisë vendosi për dekriminalizimin e procedurës të hënën në mbrëmje. Vendimi vjen pas një sërë vendimesh në Meksikë dhe Argjentinë që ulën barrierat ndaj abortit.
Më parë, aborti në Kolumbi lejohej vetëm kur ekzistonte rrezik për jetën ose shëndetin e nënës shtatzënë; ekzistenca e keqformimeve të rrezikshme për jetën; ose kur shtatzënia ishte rezultat i përdhunimit apo incestit.
“Ne e festojmë këtë vendim si një fitore historike për lëvizjen e grave në Kolumbi që ka luftuar për dekada për njohjen e të drejtave të tyre”, tha Erika Guevara-Rosas, aktiviste për të drejtat e grave.
“Gratë, vajzat dhe njerëzit që mund të lindin fëmijë janë të vetmit që duhet të marrin vendime për trupin e tyre”.
Ndërsa u dha vendimi, protestuesit në favor të abortit, të veshur me të gjelbër, ngjyra e miratuar nga lëvizja pro-zgjedhjes së lirë, festuan përpara gjykatës kushtetuese të Kolumbisë në qendër të Bogotas.
Mendohet se deri në 400,000 aborte kryhen çdo vit në Kolumbi, me vetëm 10% të kryera legalisht. Gjatë vitit 2020, të paktën 26,223 aborte të pasigurta u kryen në të gjithë Kolumbinë.
Sipas Causa Justa, një koalicion kolumbian për të drejtat e grave, të paktën 350 gra u dënuan ose u sanksionuan për abort midis 2006 dhe mesit të 2019, duke përfshirë të paktën 20 vajza nën moshën 18 vjeç.
Amerika Latine, një rajon tradicionalisht konservator me një besim të madh të krishterë dhe ungjillor, ka disa nga ligjet më kufizuese në botë për abortin, shpesh duke e ndaluar procedurën plotësisht. Në El Salvador, dhjetëra gra janë burgosur për vrasje pasi abortuan.
“Ne përshëndesim guximin ligjor dhe politik të gjykatës kushtetuese për të pranuar se gratë dhe vajzat kanë të drejta të plota”, tha Paula Avila-Guillen, avokate ndërkombëtare për të drejtat e njeriut dhe drejtoreshë ekzekutive e Qendrës së Barazisë së Grave në Nju Jork.
“Në mbrojtjen kushtetuese të autonomisë sonë mbi trupat dhe jetët tona, gjykata po ndryshon jetën e miliona grave dhe vajzave të dëmtuara në mënyrë disproporcionale nga kufizimet e abortit”.
Kolumbia është vendi i tretë në Amerikën Latine që dekriminalizon abortin në dy vitet e fundit.
Gjykata e Lartë e Meksikës dekriminalizoi abortin vitin e kaluar, ndërsa parlamentarët në Ekuador javën e kaluar lehtësuan rregulloret që tani lejojnë abortin në rastet e përdhunimeve.
“Ndërsa sot ne po festojmë këtë vendim historik, Vala e Gjelbër është e fortë dhe lufta për të drejtat riprodhuese dhe drejtësi nuk do të përfundojë derisa çdo person të mund të zgjedhë vetë për trupin e saj”, tha Eugenia Lopez Uribe, drejtoresha rajonale e Fondacionit Ndërkombëtar të planifikimit familjar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
