Ngjarje

Kapet peshkaqeni dhelpër afër ishullit të Sazanit (VIDEO)

Një peshkaqen dhelpër është kapur këtë të shtunë nga peshkatarët në afërsi të ishullit të Sazanit. Peshkaqeni ishte i gjatë rreth 3 metra e 30 cm ndërsa peshonte rreth 200 kg dhe u kap në veri të ishullit të Sazanit, jashtë Gjirit të Vlorës. Ky peshkaqen, sipas ekspertëve, futet në llojin e specieve në rrezik zhdukjeje që s’para haset në brigjet e Shqipërisë pasi noton në ujëra me thellësi të mëdha. Peshkaqeni dhelpër qëndron gjithmonë larg bregut për të mos u evidentuar nga peshkatarët dhe qëndron gjithmonë në thellësitë mbi 70 metra.

Peshkaqeni dhelpër i kapur sot


Peshkaqeni dhelpër ka bishtin e gjatë dhe e përdor si “kamxhik” edhe për të goditur prenë e tij. Kryesisht ushqehet me peshq. Noton mirë dhe shpejt dhe ka aftësi fiziologjike të ruajë temperaturën e brendshme të trupit, më të ngrohtë se ai i ujit të detit përreth. Pavarësisht madhësisë, nuk është i rrezikshëm për njerëzit për shkak të dhëmbëve të vegjël. Ndërsa është shumë i çmuar për peshkatarët për shkak të mishit të tij dhe të vajit të mëlçisë.

 

Më Shumë