Gazeta Si - Pesë persona që dyshohet se grabitën disa ditë më parë 11 refugjatë të huaj në Gjirokastër janë arrestuar.
Policia e Gjirokastrës në bashkëpunim me atë të Kukësit dhe Tiranës ka prangosur shtetasit: S.M. 21 vjeç, N.M. 21 vjeç, A.Th. 17 vjeç, E.Sh. 20 vjeçe, banuese në Tiranë dhe E.B., 26 vjeçe, banuese në Tropojë.
Dy prej tyre u kapën në mbikalimin e Bardhocit në Kukës, duke transportuar 4 emigrantë në drejtim të Kosovës.
Ndjekja e tyre nga shërbimet e policisë zgjati 1 orë dhe një video amatore u publikua më 24 maj në rrjetet sociale.
Aty shfaqej makina e policisë duke qarkulluar në sens të kundërt në Rrugën e Kombit, sepse ishte në ndjekje të automjetit që transportonte emigrantët.
Dy të tjerë u kapën në Kamzë. Njëri prej tyre, në banesë iu gjet një pistoletë lodër metalike, 5 celularë dhe një shumë parash.
Po ashtu, u sekuestruan 3 automjete, 1 përforcues grushti, doza me lëndë të dyshuar narkotike kanabis sativa dhe 9 aparate celulare.
Këta persona morën 11 emigrantë nga vendet e Lindjes së Mesme dhe u premtuan se do t’i transportonin nga Gjirokastra në Tiranë.
Por në afërsi të fshatit Mashkullorë në Gjirokastër, i nxorën nga makinat dhe iu vodhën paratë dhe sendet personale.
Ata akuzohen për “Vjedhja me dhunë” e kryer në bashkëpunim, “Ndihma për kalim të paligjshëm të kufirit”, “Prodhimi dhe shitja e narkotikëve” dhe “Prodhimi dhe mbajtja pa leje e armëve të ftohta”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.