.png)
Nga Gazeta ‘SI’- Deputeti demokrat Belind Këlliçi ka parashtruar në Kuvend kërkesën e tij për interpelancë me kryeministrin Edi Rama, lidhur me licencimin e bankës së parë digjitale në vend, JET Bank.
Këlliçi u shpreh se nuk ka marrë përgjigje për pyetjet e drejtuara autoriteteve, ndërsa shprehu shqetësimin për rrezikun e pastrimit të parave.
“Licencimi i një banke nuk është dhe nuk duhet të shihet si një proces formal apo thjeshtë burokratik, por si një proçes gjithpërfshirës, pasi një vendimmarrje e tillë ka ndikim shumë më të gjërë jo vetëm në sigurinë e parave të shqiptarëve, por dhe në sistemin bankar në vend. Aspekti me shqetësues ku duhet të ishte dhe fokusi i qeverisë dhe institucioneve në varësi të saj është pikërisht pastrimi i parave.Sot Shqipëria është bërë bazë jo vetëm e parave të pista të grupeve kriminale, të cilat marrin tendera e leje ndërtimi për ti përdorur si lavatriçe, por ajo është edhe baza e të ashtuquajturave Call Center, me anë të së cilave mashtrohen qytetarët Europianë në vlera qindra milionë euro”, tha deputeti në fjalën e tij.
Më tej, Këlliçi shtroi pyetjet për kryeministrin, i cili nuk i është përgjigjur kërkesës së tij për interpelancë.
“A ishte Kryeministri Edi Rama në dijeni për lidhjet e dyshuara të aksionarëve të JET Bank?
A mund të garantojë sigurinë e depozitave të qytetarëve në JET Bank?
A janë kërkuar verifikime nga institucionet (Financat, PP Parave, SHISH, etj.) për burimin e kapitalit dhe rreziqet e pastrimit të parave?
A janë kryer kontrolle të thelluara mbi aksionarët dhe drejtuesit e bankës, përfshirë shtetasit e huaj të përmendur?
A janë të vërteta pretendimet për ndikim politik në procesin e licencimit të JET Bank?
Si shpjegohet rritja e kapitalit nga 927 mijë lekë në 10 milionë euro brenda 3 muajve, dhe a është verifikuar kjo nga institucionet?
A janë kërkuar verifikime nga autoritetet e huaja për aksionarët dhe strukturën e pronësisë së bankës?
A janë informuar Komisioni Europian, Banka Qendrore Europiane, Autoriteti i BE-së kundër Pastrimit të Parave (AMLA), si dhe Delegacioni i BE-së në Tiranëpër licencimin dhe strukturën e JET Bank?
A ka marrë qeveria masa për të shmangur konflikt interesi mes JET Bank dhe kompanive të tjera të të njëjtit grup me përfitime fiskale?
Këlliçit iu përgjigj ministrja e shtetit për Marrëdhëniet me Parlamentin, Erjona Ismaili e cila tha se bankat në Shqipëri “nuk i licencon kryeministri”, por një autoritet i pavarur si Banka e Shqipërisë.
“Mbikëqyrja e bankave bëhet nga institucioneve të pavarura dhe jo nga qeveria. Për ju nuk ka rëndësi se ku nis pushteti i njërit dhe tjetrit. Jemi përpara një debati për dy modele, që nuk përputhen kurrkund. Nga njëra anë është një opozitë që e shikon vendin vetëm keq dhe ka teori konspirative dhe nga ana tjetër, qeveria po punon për rrugën drejt BE-së. Bankat në Shqipëri nuk i licencon kryeministri, por Banka e Shqipërisë. Legjislativi nuk mund të ndërhyjnë tek pavarësia e bankave”, tha Ismaili.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje