Gazeta Si – Ralf Gjoni, ish-deputeti i LSI-së dhe ish-këshilltari i ish-presidentit Ilir Meta, ka dalë nga zyra e SPAK pas më shumë se 4 orësh, por ai refuzoi t’iu përgjigjet pyetjeve të mediave për arsyen e paraqitjes së tij në Prokurorinë e Posaçme.
Ai tha se ai vetë nuk është person në hetim dhe se është pyetur në lidhje me funksionet shtetërore që ka mbajtur gjatë jetës së tij.
“Jam pyetur si shtetas në cilësinë e të angazhuarit në angazhime dhe pozicione shtetërore. Nuk u pyeta si person në hetim. Nuk ka arsye për të më hetuar mua. Nuk kam qenë pjesë e dosjes së ish presidentit Meta, se s’kam qenë në kontakt me të kur ka qenë kryetar shteti. Nuk ka asnjë arsye për të më hetuar mua. Nuk mund ta them më shumë, mund të pyesni prokurorët. Dua të respektohem dhe dua të tregohem profesional, kaq kisha për të thënë”, – tha Gjoni.
Në fakt, ende nuk dihet arsyeja e vërtetë, por sipas burimeve, thirrja e Gjonit në SPAK ka lidhje me lobimin që ka bërë LSI në SHBA gjatë kohës që ka qenë në qeverisje së bashku me Partinë Socialiste.
Në vitin 2016 në media u publikuan dokumente sipas të cilave LSI ka bërë pagesa në vlerë 267,804 USD për kompaninë e saj të lobimit në Uashington, Global Security and Innovative Strategies, GSIS.
Pagesat përfshijnë tarifën mujore fikse prej 30,000 USD për kompaninë amerikane, si dhe rimbursim të shpenzimeve, që kjo e fundit ka bërë gjatë përfaqësimit të interesave të liderëve të LSI-së pranë kongresit të SHBA-ve dhe administratës amerikane.
Më herët SPAK ka nisur hetimet për tre kallëzime të bëra ndaj ish-Presidentit Ilir Meta dhe ish-kryetares së LSI, Monika Kryemadhi, bashkëshortja e tij.
Tre hetimet prej disa muajsh janë në një procedim të vetëm në duart e SPAK, ku mes tyre është edhe çështja për të cilën Prokuroria e Posaçme dyshohet se ka thirrur Gjonin si person që ka dijeni.
E para që u pyet për pasurinë e çiftit Meta-Kryemadhi ishte Fatime Kryemadhi, nëna e Monika Kryemadhit.
Ralf Gjoni ka qenë këshilltar për Marrëdhëniet Ndërkombëtare në LSI dhe një nga bashkëpunëtorët më të ngushtë të Ilir Metës gjatë periudhës që kjo parti qeveriste si aleate me Partinë Socialiste.
Nga ana tjetër, Ralf Gjoni është një nga dy deputetët e LSI-së që nuk pranuan të digjnin mandatin në shkurt 2019, duke dalë kundër vendimit të kryetares së atëhershme të partisë, Monika Kryemadhi.
Ndërkohë, ditët e fundit, kreu i Partisë së Lirisë, Ilir Meta ka shtuar sulmet ndaj kreut të Prokurorisë së Posaçme, Altin Dumani.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
