.png)
Instituti Ndërkombëtar i Medias ka reaguar duke e cilësuar të tepruar reagimin e policisë së shtetit ndaj gazetarëve gjatë protestave që përfshinë vendin kundër rritjes së çmimeve.
“Instituti dënon dhunën e policisë kundër gazetarëve shqiptarë gjatë protestave në disa qytete këtë muaj. Policia duhet të tregojë vetëpërmbajtje përballë gazetarëve dhe të garantojë sigurinë e punonjësve të medias gjatë protestave”, thuhet në deklaratë.
Sipas këtij Instituti, gjatë protestave të 11 marsit, të paktën dy gazetarë u sulmuan në Tiranë dhe në Durrës.
“Gazetarët po raportonin protestat mbi rritjen e çmimeve të ushqimeve, karburantit dhe energjisë, që shpërthyen në disa qytete shqiptare”, vijon deklarata.
“Dhuna policore ndaj gazetarëve që raportojnë protestat është një shkelje flagrante e lirisë së medias. Autoritetet shqiptare duhet të respektojnë të drejtën e gazetarëve për të raportuar dhe garantojnë sigurinë e tyre gjatë ushtrimit të detyrës. Autoritetet duhet ta bëjnë të qartë se dhuna ndaj gazetarëve është e papranueshme, duke hetuar këto incidente dhe duke vënë para përgjegjësisë personat përgjegjës”, thuhet në deklaratën e Scott Griffen, zv.drejtori i International Press Institute.
IPI është një organizatë globale e themeluaar që në vitin 1950, që aktualisht ka një rrjet të gjerë anëtarësh nga 120 vende të botës, si dhe gëzon statusin e këshillimit për çështjet e medias pranë OKB-së, UNESCO-s dhe Këshillit të Europës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
