Interneti shfrytëzohet në mënyrë të barabartë nga njerëzit dhe robotët

Numri i përdoruesve humanë në internet tashmë është i barabartë me numrin e bots (robotët web), siç bëhet e ditur nga një raport i rëndësishëm, duke ngritur shqetësimin se “interneti po vdes”. Muajt e fundit, e ashtuquajtura “teoria e internetit të vdekur” ka fituar një popullaritet të ri. Kjo teori sugjeron që pjesa më e madhe e përmbajtjes në internet në fakt gjenerohet automatikisht dhe se numri i njerëzve në web po zvogëlohet në krahasim me llogaritë bot.

Tani një raport i ri nga kompania e sigurisë kibernetike Imperva sugjeron se teoria po bëhet gjithnjë e më e vërtetë. Pothuajse gjysma, 49.6%, e të gjithë trafikut të internetit erdhi nga robotët vitin e kaluar. Kjo është një rritje me 2% në krahasim me vitin e kaluar dhe është numri më i lartë i parë ndonjëherë që nga fillimi i llogaritjes në 2013. Në disa shtete, situata është më e keqe.

Në Irlandë, 71% e trafikut të internetit është e automatizuar. Një pjesë e kësaj rritjeje është rezultat i adoptimit të inteligjencës artificiale gjeneruese dhe modeleve të mëdha gjuhësore. Kompanitë që ndërtojnë ato sisteme përdorin bots për mbledhjen e të dhënave që më pas mund të përdoren për t’i trajnuar ato. Disa nga ata robotë po bëhen gjithnjë e më të sofistikuar, paralajmëroi Imperva. Gjithnjë e më shumë prej tyre vijnë nga lidhjet rezidenciale të internetit, gjë që i bën ato “të padukshëm”.

“Robotët e automatizuar së shpejti do të tejkalojnë përqindjen e trafikut të internetit që vjen nga njerëzit, duke ndryshuar mënyrën se si organizatat i qasen ndërtimit dhe mbrojtjes së faqeve dhe aplikacioneve të tyre”, thotë Nanhi Singh, menaxher i përgjithshëm për sigurinë e aplikacioneve në Imperva.

“Ndërsa prezantohen më shumë mjete të fuqizuara nga AI, robotët do të bëhen të gjithëpranishëm.“

Përdorimi i gjerë i robotëve tashmë ka shkaktuar probleme për platformat si X. Postimet më të shikuara në platformë tani sulmohen nga një numër i madh komentesh nga llogaritë që reklamojnë pornografi, dhe kompania duket se po përpiqet t’i kufizojë ato.

Kohët e fundit, pronari i X Elon Musk tha se faqja do të fillojë të faturojë përdoruesit që duan të shpërndajnë postime dhe të ndërveprojnë me të tjerët.

“Kjo është mënyra e vetme për të ndaluar përhapjen e llogarive të automatizuara”, tha ai.

Burimi: The Independent. Përshtati: Gazeta Si.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.