Teknologji dhe Inovacion

Infocom X, aktiviteti më i madh teknologjik në Shqipëri, për të rinjtë këtë vit

Sabina Veizaj – Mund ta besoni se hakeri më i ri në botë është 10 vjeç?
Ai quhet Kristoffer von Hassel (i lindur më 2009) i cilësuar si hakeri më i ri në botë, është pranuar për të qenë studiuesi më i ri për çështjet e sigurisë kibernetike i listuar në Techcenter të Microsoft.

Pasi përpiqej të luante në lojërat elektronike të të atit ku nuk mund të hynte dot për shkak të bllokimeve të vendosura enkas për të shmangur incidentet për një fëmijë 5 vjeçar, Hasseli i vogël përpiqej të hakeronte në sistemin Xbox Live duke kryer kombinime të ndryshme passëordesh (fjalësh kyçe).

Në fund, ai gjeti një anomali të sigurisë që i lejoji të zhbllokonte sistemin. Pasi e kishte shfrytëzuar gropën e sigurisë, prindërit e Hasselit e gjetën atë duke luajtur video lojëra të ndaluara dhe me ngulm e pyetën se si ai kishte arritur të fitonte aksesin. Pasi ai u tregoi atyre, I ati kontaktoi Microsoft-in për t’i informuar ata në lidhje me problemin e sigurisë.

Microsoft do t’i përgjigjej: “Ne gjithmonë dëgjojmë klientët tanë dhe i falënderojmë ata për sjelljen e çështjeve në vëmendjen tonë. Ne marrim seriozisht sigurinë në Xbox dhe e shënuam problemin sapo mësuam për këtë. “Ata gjithashtu i dhanë Hasselit një abonim falas për një vit në Microsoft Live Gold, katër video games dhe 50 $.

Në sajtin e vet Microsoft e ka renditur tashmë 10-vjeçarin në listën e kërkuesve për çështjet e sigurisë.

Teknologjia tashmë nuk është vetëm një sektor ekzotik, por që po i shërben të gjithë sektorëve dhe kryesisht është në duar të të rinjve.

Për këtë, në 10-vjetorin e saj Konferenca Infocom ka vendosur të ndryshojë qasjen dhe aktorët e aktivitetit duke e fokusuar tek të rinjtë; studentë dhe jo vetëm, por që janë të apasionuar pas teknologjisë. Këtë vit si partner mediatik i është bashkuar konferencës Infocom edhe Gazeta “Si”.

“Të rinjtë, studentët na detyruan për mirë që të ndryshonim qasjen e aktivitetit. Ishte interesi i tyre i madh në konferencat precedente që na bëri të rrisnim përmasat dhe qasjen, na bëri të dilnim me 4 aktivitete paralele që u dedikohen dhe përfshijnë të rinjtë,”më thotë në një bisedë Idit Riza, menaxheri komercial i konferencës teknologjike Infocom.


Infocom që feston vitin e 10-të saj, vjen në një edicion special dhe këtë vit nuk mban më emrin Infocom Albania, por është quajtur Infocom X, What’s next? Cfarë na pret në të ardhmen me këtë zhvillim me hapa galopant të teknologjisë?

Infocom Albania ka nisur si një konferencë B2B; Business to Business. Më përpara vinin bizneset më të mëdha të telekomunikacionit, teknologjisë, operatorë celularë dhe debatonin. Ishte konceptuar si forum i hapur me institucione shtetërore për praktikat ligjore, legjislacionin kryesisht në lidhje me fushën.

Ky lloj interesi nisi të binte me kohën, më tregon Iditi, sepse edhe tregu, më sqaron ai, mori vrullin e vet. Pasi u zunë pozicionet kryesore në treg nga operatorët kryesorë dhe ra interesi për bashkëbisedim me qeverisjen e njëkohësisht ra edhe interesi nga institucionet përkatëse.

Organizatorët të ndodhur përballë kësaj situate dhe me një situatë të re ku të rinjtë dhe studentët ishin ndjekës të uritur të çështjeve të teknologjisë, kryesisht të sigurisë kibernetike, vendosën të bënim një lloj tranzicioni për ta kthyer në një “Tech Summit”.
“Menduam ta ndërthurnim me evente paralele, jo vetëm me tema kushtuar teknologjisë dhe sigurisë kibernetike, por duke i lënë hapësirë edhe sipërmarrjes, inovacionit dhe start up-eve. Vazhdojmë me këtë edicion i cili është më i madhi i organizuar deri më sot”, më shpjegon menaxheri komercial.

Idit Riza, manaxher komercial i Infocom Albania

Kjo konferencë do të ketë 350 – 1000 ndjekës, të cilët nuk do të kenë asnjë detyrim financiar ndaj pjesëmarrjes. Përpos konferencës ku do të ligjërojnë 10 folës të fushave të ndryshme; teknologji, financë, bankë, arkitekturë, etj, do të ketë një panair në 6 steda të oeratorëve të fushës, por që do të jenë të mirëpritur edhe kompani të tjera për të krijuar lidhje me njëra-tjetrën dhe studentë të cilëve do t’u jepet mundësi punësimi apo praktike. Gjithashtu do të ketë edhe aktivitete paralele si trajnime dhe workshop me temën e sigurisë kibernetike dhe krijimin e lojërave për celularë.

Lektori për çështjet e sigurisë kibernetike do të jetë Daniel Bohannon, i cili vjen nga Atlanta.

Madje, siç më thotë Riza, profesori ka marrë takime me disa universitete për të dhënë leksione të hapura për studentët e interesuar.

Konferenca dhe expo do të zhvillohen në katin e tretë të Hotel Plazza në qendër të Tiranës ku regjistrimi do të nisë në orën 8.30 e mandej konferenca nis një orë më vonë. Kurse aktivitetet paralele që nisin në orën 10.00 do të zhvillohen në katin e parë të së njëjtës godinë.

“Do të kemi një konkurs me hakera, hakera të mirë që do të përpiqen të thyejnë një sistem për të zbuluar ekipin më të mirë. Kjo bëhet nga shumë kompani si praktikë për të zbuluar pas thyerjes së një sistemi se ku janë dobësitë. Nuk përdoret për keq. Kemi një escape room, kjo është për koduesit. Do të futen në një dhomë dhe do t’ju duhet të zbërthejnë disa enigma për të kaluar në dhomën tjetër. Kjo do t’u dedikohet njerëzve që merren me kodim”, më shpjegon Riza.

 

Më Shumë