.png)
Gazeta Si – Një ‘re’ bletësh pushtoi fushën gjatë sfidës së Indian Uells mes Alkaraz dhe Zverev, duke sulmuar spanjollin dhe duke shkaktuar një pauzë prej dy orësh. Numri 2 në botë fiton 6-3 dhe 6-1 ndaj gjermanit dhe kalon në gjysmëfinale.
Karlos Alkaraz do të ndeshet me Janik Siner në gjysmëfinale, një ndeshje që ka vlerë të dyfishtë: kush fiton shkon në finale dhe gjithashtu siguron vendin e dytë në renditjen botërore, pas Novak Gjokoviç.
Tenisti nga Majorka e dominoi ndeshjen ndaj Aleksander Zverev, rezultati flet qartë. Ishte një ndeshje pa histori, e fituar pa vështirësi nga spanjolli, pavarësisht ndërprerjes së gjatë, pasi bletët pushtuan fushën. Alkaraz u tregua më i fortë se bletët, më i fortë edhe se Sasha Zverev.
Dukej një ndeshje e ekuilibruar në fillim. Befasia erdhi nga bletët, që në një masë të madhe pushtuan fushën e ‘Bnp Paribas Open’. Alkaraz po shërbente, kur u sulmua nga bletët, bashkë me arbitrat. Spanjolli u pickua në ballë, teksa po vraponte drejt dhomës së zhveshjes.
An American hero 🐝 #IndianWells | #TennisParadise pic.twitter.com/91owMnJoNi
— BNP Paribas Open (@BNPPARIBASOPEN) March 14, 2024
Pas gati 2 orësh, që u deshën për të larguar bletët nga një bletarritës pa dorashka apo mbrojtje tjetër, rifilloi loja. Ndeshja më pas ishte një monolog, sepse Alkaraz fluturoi drejt gjysmëfinales. Zverev u mundua të rezistonte, por pa rezultat.
Gjysmëfinalja tjetër e Indian Uells është ajo mes Tomi Pol (17) dhe Danil Medvedev (4). Amerikani eliminoi Rud (9), kurse rusi kaloi danezin Rune (7).
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
